News-Details

Da success, fastedis e speronzas

27.04.2015

Igl eveniment principal digl onn vargau dall’UCP ei la dieschavla exposiziun da commerci e mistregn EX14 el Center da sport e cultura staus. Biebein 80 expositurs ein separticipai a quella, presentond lur products e survetschs. Leutier han ils organisaturs purschiu in program da rama, denter auter in referat digl anteriur trenader dall’equipa naziunala da hockey sin glatsch, Ralph Krüger. En num dall’UCP ha il president Victor Flepp engraziau la sonda alla radunonza generala al comite d’organisaziun cul president Paul Duff ed ils commembers Curdin Cajacob, Umberto Zanin, Tomas Schmed, Ronny Zanin, Corsin Giger e Pirmin Flepp per il grond engaschament. La medema fina d’jamna ha la claustra giu aviert sias portas pil giubileum da 1400 onns. Dis dallas portas aviartas ein denton era vegni purschi dalla Distec SA e da Zai. Cumpleinamein satisfatgs dall’EX14 ei era il president dil comite d’organisaziun, Paul Duff: «Nus havein survegniu biars resuns positivs.» La mischeida d’interpresas dalla Cadi e dalla Foppa cun singulas d’ordeifer la Surselva seigi stada buna. Ella animeschi ils indigens da seconfruntar e semesirar cun la concurrenza.

Turissem dat da discutar
L’entschatta avrel ei l’uniun stada conorganisatura d’ina informaziun publica davartas las novas taxas turisticas. «Nus essan dil meini ch’ina tala orientaziun havess stuiu succeder entras ils responsabels dalla politica e dil turissem entgin temps pli baul, pia avon che tarmetter disposiziuns als pertuccai», puntuescha Victor Flepp en siu rapport annual. Igl ei previu da repeter ina tala orientaziun. «Nus lein dar d’entellir als possessurs da secundas habitaziuns e lur hosps ch’els seigien beinvegni tier nus.» Quellas constataziuns han allura era caschunau per discussiuns el ravugl dallas commembras e dils commembers presents alla radunonza. La malcuntentientscha dils possessurs da secundas habitaziuns seigi veseivla. Ins stoppi prender serius la critica da quels, pertgei els consumeschien ed investeschien en vischnaunca. Il president dall’UCP, Victor Flepp, ha medemamein tematisau la problematica dil ferm franc svizzer e quella che pertucca l’iniziativa davart il stop da baghegiar secundas habitaziuns. El sedamonda sch’il cumpromiss cattau el parlament federal ei ina fuorma acceptabla ed applicabla als basegns e las structuras da vischnauncas e vals fetg dependentas dil turissem.

Activs ed innovativs
La damonda davart igl avegnir dil commerci ed il mistregn ellas muntognas ei omnipresenta. «Tenor miu manegiar havein nus segir la schanza da surviver e sesviluppar. Nus stuein mussar activitad e far valer nos dretgs e pretensiuns. Ei drova denton era ina megliera collaboraziun da tuts e quei buca il davos era culs menaschis da gronda muntada en vischnauncas e regiun. Tier menaschis impurtonts sco las pendicularas basegna ei megliera collaboraziun cun il commerci indigen entras il niev acziunari», puntuescha Victor Flepp. Igl agir dallas Pendicularas Mustér SA enten surdar lavurs en connex cun ses projects da sanaziun ed engrondaziun ha medemamein procurau per discussiun enteifer la radunonza. Dallas incaricas surdadas il davos temps profiteschien surtut interpresas digl exteriur. Las pendicularas hagien buca realisau, ch’ins stoppi collaborar. La fin finala seigien ellas baul ni tard dependentas da conclus dalla vischnaunca. Da quei cumbat da pussonza piteschien tuts. Buca fetg ventireivla ei l’uniun era cul diember da dis ch’il Pass Lucmagn ei aviarts duront igl unviern. Tenor Victor Flepp basegna ei ina sperta migliur dallas cundiziuns. In via segira seigi d’impurtonza era per il commerci e mistregn. Il president communal Francestg Cajacob ha allura fatg allusiun cuortamein d’entgins projects ch’occuoran il mument en vischnaunca, oravontut la revisiun da differents plans da zonas. Avat Vigeli Monn e Silvio Bernasconi, il menader dil Center da cultura e seminari dalla claustra, han presentau alla radunonza dall’Uniun da commerci e professiun Mustér ils projects dalla claustra che marschan il mument ni ch’ein sin rucca. Denter auter setracta ei dalla renovaziun dalla baselgia. Ils cuosts persuenter ein calculai cun rodund 15 milliuns francs. Ina dallas grondas sfidas en quei connex eis ei da recaltgar quels mieds.