News-Details

Scuntrada cun experts dall’energia

29.04.2015

L’emprema ediziun dil «Swiss Energy Podium» ha giu liug a Mustér igl atun 2013. Lezza ga ei il lenn sco furnitur per energia staus il tema principal. Il secund podi sededichescha all’energia hidraulica. Quella ei buca mo d’eminenta impurtonza per il provediment d’energia en Svizra, mobein era ina impurtonta fatschenta per biaras vischnauncas ella muntogna. Ellas profiteschan dallas ovras, respectivamein dalla producziun d’energia, sin differentas modas e manieras. D’ina vart ei quei ils tscheins d’aua, da l’autra vart l’energia da participaziun e concessiun ch’ellas obtegnan e san aschia commercialisar. Ils prezis per la vendita d’energia ein denton curdai fetg ils davos onns. Quei han biaras vischnauncas sentiu ils davos treis onns cura ch’ei ha giu num far novs contracts per la vendita d’energia.

Strategia d’energia 2050
Il secund «Swiss Energy Podium» a Mustér porscha quater referats ed ina discussiun al podi. L’entschatta dils referats fa il directur digl Uffeci federal per energia, Walter Steinmann. El sefatschenta dalla forzau hidraulica sco part dalla segirtad dil provediment cun energia e la strategia d’energia 2050 dalla confederaziun. „La fiera europèa d’energia electrica fa da stuorn. Ils prezis da fiera pon buca cuvierer pli ils cuosts per la producziun d’energia cun aua. Tgeinins ein ils motivs? Tgei sa vegnir fatg?“, sedamonda Walter Steinmann. Tenor el ei la Svizra dependenta a liunga vesta dalla forza hidraulica sco part essenziala dil provediment cun energia electrica. «Per quei motiv ha ella in ferm plaz enteifer la strategia d’energia 2050», puntuescha il directur digl Uffeci federal per energia. Al «Swiss Energy Podium» a Mustér sedamonda el: „Tgei pass ein necessaris per posiziunar endretg a liunga vesta la forza hidraulica? Tgei contribuescha la strategia d’energia 2050 leutier?»

Futur dalla forza hidraulica
Il menader dalla divisiun hidroenergie tier l’Axpo Power SA, Rolf W. Mathis ch’ei era president dils cussegls d’administraziun dallas ovras electricas Reinanteriur SA e Glion SA, plaida davart il svilup dalla forza hidraulica duront il cuoz dil project Linthal 2015. Las empremas ideas pil project ein naschidas 2004/05. Da gliez temps era la situaziun da partenza dalla forza hidraulica cumpleinamein autra. La decisiun da baghegiar l’ovra da pumpadi Limmern ei curdada cun perschuasiun igl onn 2009. Dapi lu ha la discussiun ella societad ed ella politica concernent la sortida dall’energia atomara, energias alternativas e la posiziun dalla forza hidraulica ina nova dimensiun. Tenor Rolf W. Mathis sto la forza hidraulica cattar ils proxims onns sia posizin el context d’ina surcapacitad, midadas da prezi e la fiera libra. Egl exempel dall’ovra da Limmern vegn el a mussar tgei schanzas e rescas che l’energia hidraulica ha.

La muntogna sco victura?
Suenter ina discussiun al podi suonda al 2. «Swiss Energy Podium» a Mustér il referat da cusseglier naziunal Martin Candinas. En quel emprova el da giudicar las schanzas e rescas dalla strategia d’energia 2050 dalla confederaziun per las muntognas. En quei connex duei vegnir puntuau tgei impuls ch’il potenzial dalla forza hidraulia sa haver per las regiuns da muntogna. Quei en emprema lingia ord vesta dil manteniment e la promoziun da plazzas da lavur qualificadas sco era sco schanza per domiciliar novs secturs economics ellas muntognas. En siu referat emprova Martin Candinas era da dilucidar l’impurtonza dalla branscha d’energia per l’avertura e la qualitad da viver ella muntogna, sco era da mussar tgei mesiras che la politica savess prender.

Sut squetsch
Al quart referat dil podi sefatschenta il president dalla Cuminonza d’interess dallas vischnauncas da concessiun dil Grischun, Not Carl, dalla posiziun dallas vischnauncas da concessiun ella politica cantunala davart la forza hidraulica. L’energia electrica producida cun forza dall’aua ei il mument sut grond squetsch. El Grischun ein ils dretgs per l’aua els mauns dallas vischnauncas. Con ditg san ellas aunc defender quels e lur rendita? Not Carl ei coniniziant ed emprem president dalla cuminonza d’interess. Biars onns eis el staus deputau e president communal da Scuol. Dapresent eis el era president dalla Corporaziun dallas vischnauncas da concessiun dallas Ovras electricas Engiadina SA. Plinavon eis el president dil cussegl d’administraziun dall’EE-Energia Engiadina ch’ei vegnida fundada 2012. Quella ha acquistau las reits localas dallas pli biaras vischnauncas da concessiun e meina ussa quellas.