News-Details

Ils Pumpiers Sursassiala ein semtgai pil seracass ella gallaria digl AlpTransit a Sedrun

12.05.2015

La sonda vargada han els presentau ils dus vehichels novs che stattan a disposiziun ad els en cass ch’ei havess da dar in incaps ella gallaria. Ei setracta da dus bus equipai cumpleinamein per igl engaschament dil schurmetg da flad. Sco quei ch’il cumandant dils Pumpiers Sursassiala, Gion Tenner di, han ils dus vehichels novs custau inclusiv igl equipament ensemen rodund 450'000 francs. La finanziaziun dad els ei succedida entras la AlpTransit SA, la Viafier federala e l’Assicuranza da baghetgs dil cantun Grischun. Ils vehichels stattan denton buca mo a disposiziun per igl engaschament ella gallaria d’access. «Nus savein era nezegiar els per auters seracass. Aschia profiteschan era las vischnauncas da quella investiziun», di Gion Tenner.

 

Scolaziun speciala

22 commembers dil corp ein sescolai el Center da scolaziun dils pumpiers a Balstahl. «Per ils pumpiers ch’ein engaschai en tunnels ei quella scolaziun obligatoria. Els han numnadamein era da saver dabia pertuccont tecnica da tunnels. Per nus ei quei engaschament ina gronda sfida», declara Gion Tenner. Tiels pumpiers da Sursassiala ei ina gruppa da tschun persunas specialisada supplementarmein denter auter sin indrezs d’electricitad. Igl entir sistem ella gallaria digl AlpTransit a Sedrun ei numnadamein fetg cumplexs. La tecnica el grep pretenda enconuschientschas fundamentalas. Ils pertuccai ston enconuscher l’infrastructura ch’ei repartida sin quater alzadas. In dils vehichels ei staziunaus a Sedrun, il secund el depot a Mustér. Ils cuosts per la scolaziun speciala ed ils cuors pigl engaschament ella gallaria ha la Viafier federala surpriu. Il corp da Sursassiala dispona il mument dad 85 pumpiers, leutier ina gruppa da sis pumpiers voluntaris en Val Medel. Ultra digl engaschament ella gallaria d’access digl AlpTransit ein ils Pumpiers Sursassiala era specialisai el salvament sin via, incaps d’ieli e chemia, sco era incendis d’uaul. Il mument ei la gruppa quella cul secund grond intschess d’engaschament el cantun Grischun. Il corp ei equipaus cun buna infrastructura. Tonaton ein remplazzaments e migliurs necessarias da temps en temps. Ina proxima investiziun pli grond pertucca il camiun cun scala.

 

Semtgai pil seracass

Mintgin dils dus bus porscha plaz a sis pumpiers. Per mintgin dad els stat igl entir equipament pil schurmetg da flad a disposiziun el vehichel. Sin viadi al liug d’engaschament san els sepreparar. Medemamein dispona il manischunz d’in equipament pil schurmetg da flad. Tenor Ursin Schmid sedifferenzieschan ils dus vehichels che portan ils nums Barla e Florian, digl equipament supplementar: «In dils dus vehichels dispona ella part davostier d’in modul per stizzar fiug, l’auter per indrezs da reserva pil schurmetg da flad. Quei entir equipament secapescha buca da sesez. Per quei motiv essan nus era fetg loschs da quei che nus havein obteniu.“ Tenor Gion Tenner ston ils pumpiers quintar ella gallaria cun incaps che san menar ad incendis ni era donns d’aua. Incaps sa ei denton era dar cheu en connex cun eveniments el tunnel sez che sesanfla 800 meters pli a bass. L’entira ventilaziun dil tunnel succeda numnadamein da Sedrun, respectivamein Val Nalps, anora. «En quella gallaria succedan da temps en temps denton era lavurs da revisiun. En connex cun quellas sa ei era dar incaps per exempel cun ieli. L’infrastructura en quella gallaria ei aschidadir il cor dil niev tunnel da basa dil Gottard», puntuescha Gion Tenner.

 

Inauguraziun festiva

La sonda avon miezdi ein ils dus vehichels vegni presentai ella gallaria digl AlpTransit a Sedrun. El rom da quella fiasta d’inauguraziun ha il cau dalla communicaziun digl AlpTransit, Ambros Zgraggen, suttastrihau l’impurtonza digl engaschament dils Pumpiers Sursassiala. Duessi ei dar in incaps ella gallaria ni eventualmein schizun el tunnel, hagien els d’agir autonom en ina emprema fasa. La fin da quest onn ei previu in grond excerzi. «Ils pumpiers da Sursassiala ein fetg engaschai e persuenter essan nus engrazieivels», puntuescha Ambros Zgraggen. Loschs dil corp da pumpiers dallas treis vischnauncas sisum la Surselva ei il president communal da Tujetsch, Beat Röschlin: «Jeu sperel denton che quels vehichels novs vegnien buca savens en funcziun.» Avat Vigeli Monn ha benediu ils dus vehichels e recumandau els, las equipas dils pumpiers mo era eventuals pertuccai d’in seracass alla protecziun da Diu.