News-Details

L’aua da radon daventa puspei in tema

15.06.2015

La fin 2011 ha la Mettlen Immo SA surpriu il menaschi dil hotel Disentiserhof a Mustér. Dapresent vegn quel menaus dalla societad da menaschi Disentiserhof SA. Els dus cussegls d’administraziun sesa la medema glieud. Acziunari principal ei Rolf Engler ch’ei involvius egl Appenzell en duas clinicas che genereschan annualmein rodund 90'000 pernottaziuns. Igl anteriur cusseglier naziunal cristiandemocrat enconuscha fetg bein la scena medicinala e dalla reconvalescenza en Svizra. Denter auter eis el era commember dil cussegl d’administraziun dalla Swica. Lu eis el denton era staus engaschaus ell’associaziun dallas clinicas da reconvalescenza en Svizra. Dapi che la Mettlen Immo SA ei engaschada a Mustér, dat ei era plans per renovar ni engrondir il menaschi. Aschia exista denter auter in project per la renovaziun dall’ustria. «Il menaschi ei deficitars. Fastedis caschuna a nus oravontut il bogn», di Rolf Engler. Cun in baghetg niev, ulteriurs letgs ed ina purschida innovativa vul el menar il hotel ord las cefras cotschnas.

Investiziuns da 20 milliuns
Il venderdis sera ein ils proprietaris dallas 157 habitaziuns ella surbaghegiada dil hotel Disentiserhof vegni orientai davart ils plans da Rolf Engler. Il resun sin sias ideas ei staus per gronda part positivs, malgrad entginas vuschs criticas. La finamira dalla Mettlen Immo SA ei d’ereger el nord dil baghetg existent, pia encunter la via cantunala, in niev baghetg. Quel duei porscher 50 entochen 60 combras. Co quei baghetg vegn cumbinaus cun la purschida existenta dil hotel sco era dil bogn existent ei il mument aunc buca clar. «Igl emprem stuein nus haver la basa legala persuenter, vul dir in plan da zonas en vigur. Silsuenter vegnan quels detagls sclari», puntuescha Rolf Engler. La finamira ei ina purschida cumpleta per persunas en reconvalescenza naven dalla terapia entochen a bogns curativs. El quenta cun investiziuns da rodund 20 milliuns francs. El hotel existent ein la Mettlen Immo SA, Rolf Engler e sia consorta en possess il mument da 15 habitaziuns sco era quater combras dublas e sis combras pil persunal. Per 15 ulteriuras habitaziuns han els il mandat d’affittaziun. Ella stagiun aulta vegn occupau el menaschi denter 12 e 15 persunas. «Il grond problem che nus havein ussa ein ils temps denter las stagiuns aultas. Lu marscha fetg pauc el hotel», constatescha il possessur.

Nezegiar aua da radon
Perschuadius ei Rolf Engler dall’aua da radon a Mustér. Ella Val S. Placi exista numnadamein la pli ferma fontauna da radon dalla Svizra. «En autras tiaras vegn quell’aua nezegiada cun grond success. Ei dat studis che cumprovan claramein igl effect positiv dall’aua da radon ella reconvalescenza. Tenor miu manegiar havess Mustér ina buna schanza sin quei sectur. La finamira ei secapescha da vegnir sin la gliesta da spitals», di Rolf Engler ch’ei da professiun giurist ed engaschaus oravontut sil sectur dalla construcziun e sanadad. Il hotel Disentiserhof ha giu ina liunga tradiziun co menaschi cun bogns curativs. La fontauna dall’aua da radon exista aunc, stuess denton vegnir sanada. Medemamein fagess ei da basegns d’ereger ina nova lingia d’aua entochen el hotel. Quella fontauna era en possess dil Disentiserhof, cun l’introducziun dil cudisch funsil federal eis ei denton vegniu munchentau da segirar quei dretg.

Sil pli baul 2018

La revisiun dalla planisaziun locala che pertucca era igl areal dil Disentiserhof vegn probablamein igl atun vegnent en votaziun dil pievel. Passa quella cun success las tortas dil suveran, vul Rolf Engler lantschar ladinamein ina concurrenza d’architectura. Entochen la fin 2016 duess la damonda da baghegiar vegnir fatga. L’avertura dil hotel ei pusseivla sil pli baul igl onn 2018. Per sias intenziuns ha Rolf Engler gia menau differents discuors a Mustér, denter auter cun la vischnaunca, la claustra e las pendicularas: «Nus lein nezegiar las sinergias che seporschan. Cun la claustra dispona Mustér d’ina attracziun ch’ei lunsch entuorn enconuschenta. Gia ussa cooperein nus cun quella. Denter auter han ils hosps da vacanzas dil hotel Disentiserhof la pusseivladad da gentar ella nova ustria dalla claustra.» Activar vul Rolf Engler era las pusseivladads da seminari a Mustér. Era en quei grau vegn empruau da nezegiar las sinergias cun la claustra.