News-Details

Projects che dattan niev slontsch al turissem

19.06.2015

La mesjamna sera han ils representants dallas Pendicularas Mustér SA orientau en halla Cons a Mustér davart lur projects. Rodund 250 persunas dall’entira Sursassiala han dau suatientscha agl invit dallas suprastonzas communalas da Mustér e Tujetsch. Interess han las novitads dallas pendicularas denton era svegliau sur il cuolm ora. Representants dil turissem dad Andermatt han giu queidas da tedlar tgei che duei succeder ils proxims onns sisum la Surselva.

Resort ha prioritad
Ils representants dallas Pendicularas Mustér SA Marcus Weber, Ruedi Büchi, Otmar Venzin e Marco Schmed han presentau ils treis gronds projects. Emprema prioritad ha il resort da vacanzas a S. Catrina, numnaus Resort Catrina. Sils parcadis dallas pendicularas visavi la staziun da val ei previu ina gronda surbaghegiada cun parcadis, fatschentas, ustria, in hostel e habitaziuns. «Tut en tut setracta ei da 700 letgs. Cun quels lein nus generar rodund 30'000 pernottaziuns», di Marcus Weber. Aschilunsch ch’il plan da zonas vegn approbaus quest atun dil suveran, duein las lavurs vid quei resort vegnir lantschadas ladinamein primavera proxima: „La projectaziun ei avanzada, nus essan semtgai pil project. Il medem savein nus era dir dalla finanziaziun.“ Tenor Marcus Weber duei ei buca dar in resort da luxus, mobein unitads da vacanzas finanziablas oravontut per famiglias, il segment principal avisau dallas pendicularas. Il resort ei da muntada era per las autras investiziuns previdas. «Las pendicularas ein dependentas d’ulteriuras entradas. Mo lu eis ei pussevel d’investar en auters projects. Per quei motiv ei il resort da gronda muntada», suttastreha Marcus Weber.

Ina nova pendiculara

Cun ulteriurs projects manegia Marcus Weber la nova colligiaziun da Sedrun/Salins siadora el territori da skis da Mustér el contuorn dil Cuolm da Vi. Tenor Ruedi Büchi eis ei previu d’ereger ina pendiculara cun duas cabinas cun plaz per mintgamai 70 persunas e sisum sper la staziun da muntogna in restaurant da panorama. Leu duei era vegnir baghegiau in niev runal. A Cungieri duei vegnr scaffiu la pusseivladad da bandunar la cabina. En ina emprema fasa ei previu ina scala dalla petga giuadora, en ina secunda eventualmein in ascensur. Davart las Pendicularas Mustér SA vegness ei benevenau sche l’ustria a Cungieri vegness reactivada. Il project per la pendiculara ei gia recepius el plan directiv regiunal. Tenor Marcus Weber ei il project calculaus minuziusamein: «Mintga investiziun sto render. Cun quei project essan nus denton alla limita.“ In ulteriur project ei quel d’ennevar el contuorn da Gendusas entochen S. Catrina. La basa per la revisiun dalla planisaziun ei scaffida, il project ei aschilunsch avon maun. Emprema prioritad da quei project ha la pista dall’emprema sutgera. Giavischau fuss denton era d’ennevar la pista a val entochen S. Catrina.

Era pil turissem da stad
Ils representants dallas Pendicularas Mustér SA ein perschuadi ch’ei drova denton era in niev moviment el turissem da stad. Buca il pli davos per quei motiv vegn la nova pendiculara a Sedrun erigida. «La Surselva ha in grond potenzial era per la stagiun da stad, seigi cun sia reit da sendas, la tgina dil Rein e la claustra, mo era las pusseivladads dil Center da sport e cultura. Nus stuein semplamein empruar da nezegiar meglier quella purschida», di Marcus Weber ch’ei hosp da vacanzas a Mustér dapi 40 onns. Il fundament legal per ils projects pertuccont il resort ed ils indrezs da producir neiv artificiala vegn tschentaus igl atun vegnent. Tenor il president communal Francestg Cajacob vegn la revisiun dalla planisaziun locala pertuccont ils plans da zonas en votaziun dil pievel ils 18 d’october 2015. Sin la presentaziun dils projects la mesjamna sera en halla Cons ha ei dau differentas reacziuns. Las intenziuns dallas Pendicularas Mustér SA ein vegnidas beneventadas da pliras varts. Denton ei era vegniu reacziuns sin la collaboraziun turistica. En quella discussiun ei Marcus Weber denton buca seschaus en. Perencunter ha el priu claramein posiziun pertuccont ina colligiaziun da tariffas cun las pendicularas da Sedrun ed Andermatt: «Nus purschin maun persuenter. Jeu haiel plidentau igl atun vargau ina persuna involvida a Sedrun ed Andermatt, mo haiel silsuenter survegniu negin resun pli.»