News-Details

Ils emprems Chines ein cheu

15.07.2015

Oriundamein haveva la scola claustrala a Mustér la finamira da saver porscher instrucziun a tschun entochen otg studentas e students dalla China il proxim onn da scola. Entochen ussa ein las annunzias definitivas da treis arrivadas sisum la Surselva: Dus giuvenils dalla regiun da Nanjing ed in dil contuorn da Peking. Sco quei ch’il rectur Bruno Hensler ha detg sin damonda dall’Agentura da Novitads Rumantscha, ein las lubientschas da vegnir en Svizra aunc pendentas tier dus giuvenils. «Il mument savein nus aunc buca, schebein els dus san effectivamein vegnir en Svizra per frequentar il gimnasi. Quella procedura da lubientschas ei relativamein stentusa e nus sperein ch’ella sappi vegnir unificada igl avegnir. Nus essan optimists che quei reusseschi», puntuescha Bruno Hensler.

Viadi en China
L’entschatta uost viseta ina delegaziun da treis persunas dil gimnasi dalla claustra da Mustér la China. Sin viadi da Peking a Nanjing e Shanghai vegn ella tschercar il disucors cun direcziuns da gimnasis e geniturs. Medemamein eis ei previu d’organisar seras d’informaziun per persunas interessadas. «Nus savein ch’ils Chines han grond interess da promover lur affons ella formaziun. Quei sa era esser egl exteriur. Pil pli setracta ei da famiglias bein situadas», di Bruno Hensler. Cun la turnea atras la China vul il gimnasi da Mustér nezegiar la caschun che seporscha. Ils treis giuvenils chines che frequentan naven dalla fin d’uost definitivamein il gimnasi dalla claustra a Mustér absolvan entochen lu ina instrucziun intensiva da tudestg. Il program preveda siat jamnas a mintgamai 24 lecziuns. La finamira ei da contonscher il nivel dil lungatg tudestg ch’ils Romontschs han per la tiarza classa gimnasiala, aschia ch’els duessen allura puder absolver la medema materia. «Duessen els tonaton buca esser aschi lunsch, vegnan els ad obtener lecziuns supplementaras, per exempel la sonda. In’instrucziun duront la sonda ei per els negin problem, els vegnan cheu per ir a scola», declara Bruno Hensler. Cun l’integraziun da giuvenils che san buca tudestg ha la scola claustrala gia fatg experientschias: «Nus havein integrau en nossa scola scolars dil Tessin ni era dall’Ucraina che savevan era buca tudestg. Ei dat denton era la pusseivladad da luvrar per engles cun els.»

Program d’integraziun
Per ch’ils scolars chines s’integreschien bein el menaschi da scola, mo era ella regiun, ein differentas mesiras previdas. Tier l’arrivada ils davos dis ei vegniu presentau ad els e lur geniturs la regiun. Plinavon duein las scolaras ed ils scolars oriunds dalla China vegnir integrai el sistem familiar. «Nus lein che quels giuvenils sesentien bein cheu tier nus. Per quei motiv lein nus intensivar il contact denter els ed autras studentas e students dil gimnasi en fuorma d’in project d’integraziun. Emprems giuvenils dalla regiun ein gia s’annunziai per collaborar», di Bruno Hensler. La finamira dils Chines ei d’absolver a Mustér la tiarza entochen la sisavla classa gimnasiala.

Il gimnasi ses’arva
Miez mars da quest onn han ils responsabels pil gimnasi dalla claustra a Mustér annunziau lur intenziun da ses’arver per studentas e students dalla China. Il project che tegn quen dalla tradiziun multiculturala dalla claustra vegn realisaus ensemen cun la Fundaziun svizra «Bildungsanker». Quella vul possibilitar a gimnasiast(a)s ambiziunai dalla China da studegiar a Mustér e d’absolver cheu la matura. Cheutras seporscha allas scolaras ed als scolars dil gimnasi e lur magisters la pusseivladad d’in brat cultural internaziunal. Da quella purschida duein ton las studentas ed ils students dalla China profitar, mo era il gimnasi sez. Il brat cultural ei el senn dalla scola claustrala. Il president dalla fundaziun «Bildungsanker», Zen-Jiang Wang, ei staus sez scolar dil gimnasi a Mustér, sco era Andreas Kühnis ch’appartegn medemamein alla gruppa da project.