News-Details

In depot da locomotivists sisum la Surselva?

23.07.2015

Dapi entgins onns ei il survetsch dalla viafier exponius a grondas midadas. Ferton che mintga staziun era occupada pli baul cun persunal, ein biaras oz senza survigilonza. Bigliets san vegnir retratgs agl automat ni pli e pli era online. Sulettamein aunc ina tiarza dils bigliets vegnan vendi al spurtegl. Quella tendenza crescha vinavon e cheutras eis ei era da quintar cun ina sminuaziun da loghens da vendita occupai cun persunal. La consequenza ei ina sperdita da plazzas da lavur ellas regiuns. La reducziun vegn a tuccar en emprema lingia loghens pli pigns e cheutras regiuns periferas e muntagnardas. Rinforzada vegn quella tendenza dalla vendita d’abonnaments generals ed auters abonnaments. Biars vegnan cumprai a Berna ni a Cuera e reduceschan cheutras la sviulta allas staziuns pli pintgas. Las premissas per l’existenza d’ina staziun occupada cun persunal vegnan augmentadas cuntinuadamein. In exempel ei il cantun Uri. Leu meina la Viafier federala gia negins spurtegls da vendita pli. Il spurtegl a Flüelen ei dapi dus onns aviarts sulettamein aunc entgins meins da stad.

Era Mustér ei pertuccau
En rodund treis onns eis ei previu d’introducir alla staziun a Mustér in sistem cumpleinamein automatic per igl entir menaschi da traffic. «Cheutras sereducescha il diember da persunal da 4,6 sin treis plazzas», di il president communal Francestg Cajacob. Per cumpensar quella sperdita ei la suprastonza communala da Mustér sedrizzada alla Viafier retica cun la damonda da realisar in depot per locomotivists sisum la Surselva. Concretamein vul quei dir: Diesch locomotivists havessen dimora ella regiun e luvrassen da cheu anora sco locomotivists per la Viafier retica sco quei ch’igl ei il cass per exempel era a Tavau, Scuol e Samedan. «Tenor nies manegiar duess ei esser pusseivel da realisar quei depot cun diesch locomotivists sch’ins patratga che la Viafier retica ha totalmein 227 locomotivists per sia reit», puntuescha Francestg Cajacob. Il mument vegnan ils depots a Landquart e Cuera preferi, damai ch’els ein puncts principals dalla Viafer retica. Concernt in depot da locomotivists sisum la Surselva ei il deputau René Epp gia s’adressaus igl unviern cun ina incumbensa dalla regenza. Lezza ha rispundiu quella en quei senn, ch’ina tala damonda seigi caussa dallas duas viafier pertuccadas.

Depot cun diesch maschinists
Per saver realisar ina depot basegna ei diesch locomotivists ch’ein promts da prender domicil ella regiun. Tenor Francestg Cajacob ei quei buca sempel, mo tonaton realisabel. La Viafier Matterhorn Gottard dispona a Mustér d’in depot da sis maschinists. «Quei muossa che l’idea ei realistica. Igl exempel dalla Viafier Matterhorn Gottard muossa ch’igl ei pusseivel da disponer cheu d’in depot cun dameins che diesch persunas», puntuescha il president communal. En siu scriver alla Viafier retica fa la suprastonza communala menziun dallas pusseivladads che sedattan entras in depot a Mustér. Dallas finanzas enneu vesa ella ch’in tal depot ei responsabels. Ussa eis ei numnadamein aschia ch’ils treis locomotivists ch’arrivan cun ils davos trens a Mustér, dorman cheu per silsuenter carrar cun ils emprems trens a Cuera. Tenor Francestg Cajacob ei il star sur notg ordeifer buca giavischau dils locomotivists.