News-Details

Scuntrada dil Portugal cun il Grischun a Mustér

07.09.2015

La scuntrada ha liug sonda, ils 19 da settember 2015 el Center da sport e cultura e cumpeglia differents elements da sentupada e divertiment. L’emprema part porscha in’activitad sportiva. Differentas equipas da ballapei da carschi ed affons ton dil Portugal sco dil Grischun semesiran sin la plazza da ballapei artificiala. Dasperas vegn purschiu ulteriurs giugs per pign e grond. Pli tard vegn offeriu ina grillada e la sera ha liug ina scuntrada culturala cun musica e sault, cumbinada cun informaziuns davart il Portugal. Da veser ed udir ein differentas gruppas portughesas e grischunas sco Silvia Mitev cun Tiago Santos e Joao Correia, la Grupo rancho da Hinwil, l’Uniun da costums Mustér ed il musicist Mattiu Defuns. L’entrada a quella sentupada culturala ei libra. Informaziuns detagliadas davart il program ein da cattar sin la homepage www.forum-disentis.ch. La fin d’annunzia per equipas che vulan separticipar als giugs da ballapei amicabels ei ils 7 da settember 2015.

Collaboraziun dils Portughes
L’iniziativa da quella scuntrada denter Grischuns e Portughes ei vegnida dil Forum cultural internaziunal Mustér. Ell’organisaziun digl arranschament separticipescha denton era ina gruppa da quater Portughes. «Els han dau differents impuls pil program e segidan era vid la lavur organisatoria», di la president dil forum, Jacinta Jacomet. Portughes stattan bugen da cumpignia, lur fiastas ein familiaras e savens era cumbinadas cun musica. Grazia allas relaziuns ch’els han eis ei stau pli sempel da procurar per gruppas. Per il turnier da ballapei ein entochen ussa mo las equipas da carschi dil Portugal e dil Grischun seformadas, sco era ina d’affons. Jacinta Jacomet spera ch’ulteriuras annunzien lur participaziun entochen gliendisdis. Ils organisaturs han orientau denter auter las scolas da Tujetsch entochen Breil. «La finamira ei ina fiasta da giuven e vegl e da vischins dall’entira Cadi e per quei motiv fagess ei plascher sche biars separticipassen. Cun quels giugs da ballapei amicabels lein nus far la punt denter Portughes ed indigens», puntuescha Jacinta Jacomet. Schebein la fiasta vegn arranschada in’ulteriura ga dependa en special dalla participaziun. «Jeu sundel fetg spanegiada tgei resun che nossa purschida ha», di Jacinta Jacomet. La vischnaunca da Mustér metta a disposiziun las localitads per la fiasta e la Banca Raiffeisen Cadi sustegn igl arranschament cun ina renconuschientscha per mintga participonta e participont. Il forum sez s’engascha cun lavur ed era finanzialmein vid quei arranschament.

In forum activ
Dapi sia fundaziun igl onn 1999 ha il Forum cultural internaziunal Mustér organisau in tschuppel arranschaments. Denter auter era scuntradas da minoritads. Quellas ein sedadas grazia allas relaziuns dil forum cun l’Uniun federalistica dallas gruppas popularas dall’Europa (FUEV). 2005 ha giu liug il seminari internaziunal per minoritads linguisticas a Mustér e 2007 ei suandada ina sentupada dils Aromuns da pliras tiaras, organisada dalla fundaziun Convivenza en cooperaziun cun il forum. Sin iniziativa dil Forum cultural internaziunal Mustér ha giu liug el Grischun igl onn 2008 l’Europeada, il campiunadi europè da ballapei dallas minoritads linguisticas. Ils davos onns ha il forum purschiu denter auter ina sentupada cun la cultura russa e la cultura africana. Omisdus arranschaments han giu in fetg bien resun.