News-Details

Andermatt/Ursera vul pil mument negina destinaziun turistica cun Sedrun e Mustér

30.09.2015

l matg ha la suprastonza communala da Tujetsch visau la collaboraziun cun Sedrun Mustér Turissem. Igl emprem ei quei succediu immediatamein sin la fin da matg, silsuenter ei vegniu communicau che la visada mondi en vigur la fin d’october, respectivamein la fin digl onn da fatschenta 2015/16 da Sedrun Mustér Turissem. Tujetsch da sia vart ha giu communicau che la vischnaunca vegli cooperar turisticamein igl avegnir oravontut cun Andermatt. Ladinamein ein ils discuors vicendeivels cun tut ils partenaris vegni lantschai. Il project pareva sin buna via. Miez uost ei vegniu communicau, che las vischnauncas ed organisaziuns da turissem d’Andermatt/Ursera, Tujetsch e Mustér seigien sin buna via da cattar ina soluziun per ina organisaziun da turissem communabla. La finamira era da realisar quella ton pli spert. Ussa paran quels plans gia puspei d’esser maculatura.

Analisau la situaziun
La sonda vargada ein las vischnauncas da Mustér e Tujetsch vegnidas orientadas dil commember dalla suprastonza dad Andermatt Ursera Turissem, Franz Egle, ch’il temps per la fundaziun d’ina organisaziun da turissem (DMO) dils treis loghens seigi aunc buca madirs. Per quei motiv vegnien las discussiuns interruttas il mument. Tenor la suprastonza dad Andermatt Ursera Turissem exista la pusseivladad d’ina cooperaziun bilaterala ni trilaterala en fuorma da projects ni cunvegnientschas da prestaziun. Sco quei ch’il directur da turissem d’Andermatt, Flurin Riedi, precisescha enviers l’Agentura da Novitads Rumantscha, ei Andermatt Ursera Turissem promt da collaborar cun Sedrun e Mustér sin basa da projects: «Nus essan promts d’examinar las pusseivladads che sedattan, seigi pertuccont products pigl unviern sco per la stad.» Tenor el ei l’idea d’ina organisaziun da turissem buca morta. La realisaziun d’ina tala seigi denton cumbinada cun fetg biars facturs. Cura ch’ei savess dar ina DMO ei il mument tut auter che clar.

Ina surpresa
Per il president communal da Tujetsch, Beat Röschlin, ei la novitad dad Andermatt/Ursera ina gronda surpresa: «Nus havein investau fetg bia temps e lavur en ina soluziun communabla. Andermatt ha secapescha il dretg da decider aschia. Suenter ils clars signals dallas davosas jamnas, era en connex cun l’emprema badelada per la nova sutgera sigl Alpsu, erel jeu optimists. Nus sesanflein ussa en ina nova situaziun da partenza.» Tenor Beat Röschlin vegn ei ad esser necessari da sedicuorer il proxim temps cun ils differents partenaris. Aschia vesa el la necessitad da seconferir cun las autoritads cantunalas e cun la vischnaunca da Mustér: «Tenor miu manegiar stuein nus empruar da saver collaborar cun Andermatt silmeins en fuorma da projects.» Quei duei succeder en discussiun cun Andermatt Ursera Turissem, mo era cun Surselva Turissem oravontut pertuccont la stad. «Nus spitgein denton era signals davart las pendicularas, vul dir dalla Andermatt-Sedrun Sport SA», di Beat Röschlin. Dapi rodund in’jamna ei la vischnaunca da Tujetsch dil reminent buca pli representada ella suprastonza da Sedrun Mustér Turissem. Gerau Christian Albin ei seretratgs da quella.

Promts da collaborar
«La vischnaunca da Mustér ei aviarta per ina collaboraziun cun Sedrun e scapescha era cun Andermatt sin basa da projects. Suenter quella decisiun dad Andermatt/Ursera sepresenta per nus denton ina nova situaziun», di il president communal da Mustér, Francestg Cajacob. El ei perschuadius che las duas vischnauncas ston cuntinuar cun la lavur turistica el rom dall’organisaziun communabla Sedrun Mustér Turissem: «En tgei fuorma che quei duei succeder ei secapescha basa da discussiun il proxim temps.»