News-Details

Simon Camartin diregia igl Academic Youth Symphony Orchestra da L’viv

23.12.2015

Il tems d’Advent, Nadal e Daniev ei adattaus per arranschaments culturals, oravontut da musica. Bein enqual formaziun seprepara per quei motiv intensivamein sin quei temps, respectivamein sin ses arranschaments delectonts. Ils concerts enriheschan la veta culturala en biars loghens. En differents ein els schizun daventai in factur economic che cumpletescha la purschida turistica.

Impurtonta funcziun
Ils concerts han denton era ina funcziun ord vesta dalla formaziun, oravontut en loghens pli pigns e leu nua che concerts – per exempel classics – han liug mo sporadicamein. Savens vegn la giuventetgna confruntada per l’emprema ga cun la purschida e la musica d’in orchester da sinfonia. Quels aspects giustificheschan pia il manteninment dils concerts tradiziunals el temps dalla scumiada digl onn. Dapi plirs onns s’audan ils concerts cun musica classica, dirigi da Simon Camartin da Mustér, denter quels. Era uonn seporschan treis caschuns d’udir ils concerts, numnadamein ad Vaz-sut, Mustér e Falera. Simon Camartin ei era sedecidius uonn per ovras bein enconuschentas da cumponists renomai. Leutier s’audan denton era entginas ovras ch’ein stadas meins savens d’udir entochen oz. Cheutras e cun risguard dad ovras da differents cumponists obtegn il concert ina interessanta mischeida musicala. A Mustér vegn il concert arranschaus cun sustegn dil Forum cultural internaziunal.

En treis loghens
En ses concerts cheu el Grischun risguarda il dirigent Simon Camartin adina puspei era giuvens musicists, era dalla regiun. Era uonn ei quei il cass. Sco solists ei d’udir denter auter il Grischun Livio Russi (clarinetta). Il giuven musicist da Trimmis stat avon ina gronda carriera sco solist. Buca per nuot eis el vegnius undraus dil cantun Grischun cun in premi da promoziun. El concert a Vaz-sut ei il clarinettist Nils Kohler d’udir sco solist. Igl element principal ei igl Academic Youth Symphony Orchestra da Lemberg. Quella formaziun secumpona dils pli talentai musicists professiunals che absolvan lur scolaziun alla Academia da musica dil marcau L’viv el vest dall’Ucraina. Medemamein da Lemberg deriva la sopranista Anastasia Kornutjak che ha gest entschiet ina gronda carriera internaziunala en differentas enconuschentas casas d’opera. A Falera ei era il pianist Andriy Dragan dall’Ucraina d’udir. El ha gudignau il Prix Credit Suisse ed ei sepresentaus denter auter al Lucerne Festival, mo era ad auters gronds festivals. Bein enconuschents ei naturalmein era il dirigent sez, Simon Camartin da Mustér. Dapi biars onns diregia el gronds orchesters sigl entir mund. Cun la direcziun digl Academic Youth Symphony Orchestra da L’viv cuntinuescha el cun la collaboraziun cun ils sis orchesters professiunals dalla metropola culturala Lemberg el vest dall’Ucraina. Simon Camartin ha semtgau in attractiv program cun musica bein adattada pils dis da fiasta. Aschia risguarda el ovras d’enconuschents cumponists sco Johann Strauss, Josef Strauss, Franz Schubert ni era Gioachino Rossini, Felix Mendelssohn e Luigi Arditi.  

Ils concerts han liug ils 27 da december ella halla purivalenta a Vaz-sut, ils 28 da december ella Sala Peter Kaiser a Mustér ed in di pli tard ella Fermata a Falera. A Mustér sa vegnir fatg diever dalla preventida ella Papetaria Hosang ed a Falera sur la homepage www.lafermata.ch ni tier l’informaziun turistica. A Vaz-sut vegn arranschau negina prevendita.