Beinvegni

Cordial beinvegni a Mustér

Engraziel fetg che Vus demusseis interess per nossa vischnaunca.

Mustér ei in vitg claustral che vala da vegl enneu sco center dalla Cadi ed era sco subcenter dalla regiun Suselva.

Il num Disentis deriva da "desertina" quei che vul dir ton sco desiert, terren nuncultivau. La derivonza da Mustér ei da cattar el num latin "monasterium", quei ch'ei d'attribuir alla Claustra benedictina ch'exista gia dapi varga 1'400 onns en nossa vischnaunca. La Claustra che vegn menada da paders benedictins ha accumpignau e formau dall'entschatta enneu nossa vischnaunca. Il collegi claustral ch'exista dapi igl onn 1880 gauda lunsch entuorn, en ed ord Svizra, aulta stema.

Mustér cun ses rodund 2'200 habitonts ei sesviluppau ils davos rodund 50 onns dalla vischnaunca purila tier in liug da turissem beinenconuschent e cun aulta qualitad. Nossa vischnaunca dispona d'ina infrastructura optimala per il pievel indigen, pil hosp d'unviern e da stad, per giuven e vegl. Menziun mereta cheu en special il Center da sport e cultura, il territori da skis dallas pendicularas "Disentis 3000", l'extendida e varionta reit da sendas da viandar duront stad ed unviern e la biala plazza da campar a Fontanivas. Plinavon stattan buns hotels e restaurants, stizuns da victualias, sport e moda ed auter pli a disposiziun.

Mustér ei ina vischnaunca activa che porscha sper las purschidas turisticas aunc biaras bunas plazzas da lavur ad indigens ed jasters, quei buca il davos grazia allas numerusas fatschentas da tut gener, p.ex. la Distec, garaschas d'autos e maschinas agricolas, fravia, scrinarias, picturias, papetaria, fatschentas da baghegiar, hotels, restaurants ed auters menaschis.

Mustér ei cun perschuasiun ina vischnaunca romontscha che tgira il lungatg romontsch sursilvan e la cultura romontscha. Perquei fuorma il romontsch sursilvan il lungatg ufficial dalla vischnaunca.
Ei fagess grond plascher sche Vus fagesses ina viseta ni vacanzas tier nus.

Cordials salids
René Epp, president communal