Alzament taxas da hosps e da turissem
Mesjamna, ils 17 da zercladur 2026 ha giu liug el Center Fontauna la 14avla seduta dil cussegl da vischnaunca dalla perioda d’uffeci 2025/2028. Il cussegl da vischnaunca suonda alla proposta dallas suprastonzas da Mustér e da Tujetsch ed augmenta las taxas da hosps e las taxas da turissem.
Las vischnauncas da Tujetsch e da Mustér fuorman ensemen ina destinaziun turistica communabla cun infrastructura e purschidas turisticas che vegnan nezegiadas ton dils hosps sco era dalla populaziun indigena. L’entschatta 2015 ei la davosa revisiun dalla lescha davart la taxa da hosps e turissem ida en vigur. Quella fuorma la basa legala per igl incasso dallas taxas da hosps e dallas taxas turisticas. Las taxas da turissem vegnan purtadas surtut da menaschis d’albiert, da locaturs da habitaziuns da vacanzas e dall’economia locala. Cun las entradas ord quella taxa vegn en emprema lingia finanziau il marketing dalla destinaziun, sco era promoviu eveniments da sport e cultura. Las taxas da hosps vegnan purtadas surtut dils hosps da vacanzas sur ils proprietaris da habitaziuns da vacanzas, hotels, camps e campadi. Cun las entradas ord la taxa da hosps vegn finanziau infrastructura e prestaziuns turisticas. Ils cuosts dall’infrastructura turistica e las prestaziuns turisticas ein carschi considerablamein dapi igl onn 2015. Per che la purschida sappi vegnir mantenida ed extendida el futur eis ei d’ina vart necessari d’ulivar la carischia, denton era d’instradar in alzament dallas taxas sco talas.
Aschibein la radunonza da vischnaunca da Tujetsch dils 20 da matg 2026 sco era il cussegl da vischnaunca da Mustér (seduta dils 17 da zercladur 2026) ein suandai alla proposta dallas suprastonzas communalas d’alzar la taxa da turissem sin l’entschatta 2027 per la carischia (6.1%) e la taxa da hosps per 30% plus la carischia da 6.1%. Plinavon vegn la vegliadetgna per la deliberaziun dalla taxa da hosps sminuida da 12 sin 6 onns.
Las adattaziuns dalla lescha e dil regulativ davart la taxa da hosps e la taxa da turissem van en vigur cun l’entschatta digl onn 2027.
Documents cun midadas:
- 830 Lescha davart la taxa da hosps e la taxa da turissem cun las midadas
- 831 Regulativ davart la taxa da hosps e la taxa da turissem
Translaziuns tudestgas:
- 830 Gesetz über Gäste- und Tourismustaxen
- 831 Ausführungsbestimmungen zum Gesetz über Gäste- und Tourismustaxen
Messadi per il cussegl da vischnaunca
