Enqual ski ha probabel pitiu

Hans Huonder/FMR

«Jeu sun cuntents cul decuors dalla concurrenza. Tuts ein arrivai saunamein all’arrivada. Quei ei il pli impurtont», di Luca Brunold. Per la secunda ga eis el staus il cau-cuorsa resonsabel. Cun 55 participontas e participonts ei la preschientscha alla Trofea Péz Ault stada megliera ch’igl onn vargau. Tonaton beneventassen ils organisaturs bugen pli biars a lur arranschament el territori da skis da Mustér entochen sil Péz Ault. «Secapescha pudess ei vertir pli biars», di il Lumnezian. Il temps dalla pandemia ha bia glieud scuvretg l’aventura da serender cun skis da turas els aults: «Ei fa surstar nus che nus sentin praticamein nuot da quei boom. Sto esser che l’activitad individuala ha pils pli biars pli gronda prioritad che da separticipar ad ina concurrenza. Probablamein stuein nus far megliera lavur pubica, far pli enconuschent nies event.» Che la participaziun ei stada megliera uonn ch’igl onn vargau ei tonaton in indezi ch’in concurrenza cun skis da turas ha sia calamita: «Quest unviern ein las cundiziuns da far turas buca stadas bunas. Da miu saver han las fatschentas era vendiu bia pli paucs artechels da turas. Tuttina havein nus giu pli biars concurrents.»

Buns resuns

Ils organisaturs cun Giochen Bearth sco president dil comite d’organisaziun e Luca Brunold sco cau-cuorsa alla testa, han fatg tut il pusseivel per porscher als concurrents bunas e segiras cundiziuns. «Muort la pauca neiv ei l’organisaziun buca stada sempla. Nus havein denton fatg il meglier pusseivel ord la situaziun. Cun menar pli savens las descensiuns sin pista havein nus procurau per dapli segirtad per las participontas ed ils participonts», constatescha Luca Brunold. El hagi obteniu bia laud e cumpliments e silla damonda, sch’enqualin seigi selamentaus dils sgreffels els skis, di el rient: «Na, jeu hai udiu nuot, mo ei fuss curios sche tut ils skis havessen viu ora suenter la concurrenza sco avon.»

Lavur intensiva

Ina concurrenza cun skis da turas da quellas relaziuns pretenda grond engaschament e surtut era il sustegn da biars voluntaris. Era l’auter onn duei la Trofea Péz Ault puspei haver liug. Forsa sco concurrenza dil Swiss Cup sco igl ei era gia stau il cass. «Il comite d’organisaziun vegn a decider sche nus s’annunziein pil cup. In tal ei denton cumbinaus cun bia dapli lavur.

Aschia stuein nus per exempel porscher pli gronds secturs plats per che las concurrentas ed ils concurrents hagien plaz da prender giu las pials dils skis», di Luca Brunold. Lu drovi ei denton era aunc dapli voluntaris, pertgei tut mondi lu bia pli spert: «Tut quei sto il comite giudicar en sias ponderaziuns.»

Rangaziun

Cuorsa Gendusas teams da duas persunas: 1. Aaron Lutz, Duri Pelican, Mustér, 2.04.51; 2. Lars Dolf, Nils Dolf, Almens, 2.27.49; 3. Edgar Durschei, Cédric Durschei, Segnas, 2.39.45.

Cuorsa Gendusas individual damas: 1. Aline Bischofberger, Jenins, 2.19.35; 2. Tijana Gonja, Grächen, 2.41.12.

Cuorsa Gendusas individual umens: 1. Laurin Lingenhag, Grüsch, 1.19.18; 2. Elias Egli, Grüsch, 1.39.50; 3. Rémy Bischofberger, Jenins, 1.55.55.

Cuorsa Verclisa, teams da duas persunas: 1. Marco Schmed, Gabriel Degonda, Mustér/Sumvitg, 2.44.32; 2. Anja Klittich Berther, Armin Berther, Segnas, 2.48.02; 3. Giorgio Pezzoli, Luca Re Cecconi, Pfäffikon, 3.03.03.

Cuorsa Verclisa, teams da treis persunas: 1. Pascal Arpagaus, Beda Berchtold, Stefan Schlegel, Heiligkreuz, 2.41.09.

Cuorsa Verclia, individual damas: 1. Martina Senn, Weiler, 2.14.43; 2. Jeanette Dalcolmo, Claustra, 2.38.14.

Cuors Verclisa, individual umens: 1. Marco Wildhaber, Aeschi sper Spiez, 1.46.16; 2. Nico Dalcolmo, Tavau, 1.49.32; 3. Gerhard Schneider, Mels, 1.49.38.