News-Details

«Be a Genius» – ils premis vegnan surdai a Mustér

11.01.2019

«Be a Genius» – ils premis vegnan surdai a Mustér

(cp) L’Uniun da commerci e professiun Mustér e contuorn ha giu clamau
ils giuvenils dalla regiun d’inoltrar ideas innovativas a caschun dall’exposiziun EX18 la fin d’october 2018.
Sin quei clom ein 17 projects vegni inoltrai da persunas giuvnas e da quels ein 11 vegni valetai d’ina giuria. Il grond sustegn per l’occurrenza ha la firma EMS-Chemie AG purschiu e las medias romontschas han rapportau pliras ga giudlunder. Las lavurs ein inoltradas da scolaras e scolars dil scalem ault, dallas scolas medias ed era da students dall’Universitad da S. Gagl. Medemamein ein mistergners empri ora separticipai alla concurrenza. Las ideas ensiaran baghetgs per indrezs dil temps liber per indigens e hosps, mesiras per promover il turissem ella regiun ni plazzas e stabiliments da cultura. Mo era lavurs iniziadas ni cun schanzas da realisar beinspert ein presentadas, sco per exempel ils anials digl emprendist da fravi, la APP per calcular la media dallas notas dils scolars da scola ed in stabiliment segiraus encunter rapinament e tiaratriembel per archivar datas en gronds diembers. Venderdis, ils 18 da schaner 2019 ein la rangaziun e premiaziun dall’occurrenza «Be a Genius». La giuria ha fatg ina rangaziun ed ils participonts retscheivan ils premis. Ils emprems vegnan a presentar cuortamein lur lavurs al publicum. Ils commembers dalla giuria s’expriman davart la valetaziun e dus ch’han gartegiau la noda ed ein gia sin fiera cun in product innovativ presentan quel e descrivan la via al success. Ils giuvens specialists dalla firma da medias DHD han filmau il decuors dall’EX18 e muossan la retrospectiva en sequenzas da film. 
Rangaziun dallas lavurs dalla concurrenza «Be a Genius» venderdis, ils 18 da schaner 2019 allas 20.00 en sala dalla claustra a Mustér.