News-Details

En favur dalla persistenza

06.03.2019

anr/gv) Ils skiunzs da turas absolvan la fin da mars las cuorsas finalas dil Cup mundial
el territori da skis a Mustér. Participonts che laian rumien sil percuors vegnan castigiai cun in supplement da temps.
La Federaziun internaziunala da turas da skis pretenda dils organisaturs era in concept da persistenza ed intimischa quels dad evitar immissiuns. Per las concurrenzas a Mustér ha igl inschignier forestal ed anteriur directur dallas Pendicularas Mustér Martin Kreiliger elaborau il concept. Dallas concurrenzas spetga el denton buca bia immissiuns perquei ch’il tschancun dalla cuorsa ei integraus el territori da skis ed era nezegiaus stedi per turas da skis e freeride. Immissiuns caschuna il viadi dils participonts dallas naziuns vischinontas a Mustér. Quellas immissiuns da dioxid carbonic vegnan cumpensadas cun ina contribuziun voluntaria dils participonts e digl organisatur.

La Trofea Péz Ault ha realisau in concept da persistenza

Ils 23 e 24 da mars han las cuorsas finalas dil Cup mundial da turas da skis liug a Mustér. In’jamna avon las concurrenzas a Mustér han ils Campiunadis mundials liug a Villars el cantun Vad. Ils organisaturs speran dils Campiunadis mundials in effect positiv. «Ina ni l’autra naziun stat duas jamnas en Svizra e frequenta omisduas concurrenzas», conceda Giochen Bearth, il cau cuorsa dalla Trofea Péz Ault. Tier las cuorsas dil Cup mundial ha la cuorsa populara dalla Trofea Péz Ault liug il medem mument per la dieschavla ga. Ils curriders populars partan 20 minutas suenter l’elita e diesch minutas suenter ils juniors. «Ils skiunzs da turas ein ina famiglia», ha Leo Condrau constatau ad
ina sesida dil comite d’organisaziun. El presidiescha quei comite. «Ils curriders populars ston buca semesirar culs curriders d’elita, els san denton paregliar lur temps culs megliers dil mund.»

In concept da persistenza

L’organisaziun tetgala da turas da skis ISMF (International Ski Mountaineering Federation) pretenda dils organisaturs da concurrenzas dil Cup mundial in concept da persistenza. Per la Trofea Péz Ault ha Martin Kreiliger elaborau il concept. Igl inschignier forestal tgamuna l’organisaziun «Bergwaldprojekt» cun sedia a Trin. Avon quei engaschi ha Kreiliger tgamunau las Pendicularas Mustér ed ei staus engaschaus dapi l’entschatta dalla Trofea Péz Ault ell’organisaziun. Ell’introducziun dil concept constatescha Kreiliger: «La Trofea Péz Ault ha liug en in territori da skis nezegiaus stedi per far turas da skis e sco territori da freeride.» L’organisaziun d’ina concurrenza dil Cup mundial caschuni aschia buca bia immissiuns supplememtaras.

Impedir immissiuns
L’organisaziun tetgala intimescha ils organisaturs dalla Trofea Péz Ault d’impedir immissiuns. Tenor il reglament dalla ISMF vegn il participont che lai anavos rumien sil percuors schizun castigiaus cun in supplement da temps. Il schurmetg dalla selvaschina ei medemamein ina dallas incumbensas dils organisaturs. Tenor il concept da persi stenza succeda quei denter auter cun evitar sgols cul helicopter. Damai ch’il percuors pertuchi buca niev intschess vegni la selvaschina buca disturbada supplementarmein.

Products e valurs indigenas

Allas concurrenzas dalla Trofea Péz Ault duein products indigens vegnir risguardai per aschia realisar ina creaziun da valur. Quei succeda denter auter tier la surdada dils premis naturals ch’ein tut products dall’agricultura indigena. Ils participonts ein per la pli gronda part sut tetg ella vischinonza dil liug da partenza dalla trofea respectiv dallas Pendicularas Mustér. Plinavon ein ils participonts informai dil bus local ch’ei gratuits. Aschia caschunien ils participonts el liug strusch immissiuns da traffic. Immissiuns selaian denton buc evitar cul viadi dils participonts a Mustér ed anavos. Kreiliger calculescha las immissiuns cun 27,2 tonnas dioxid carbonic. Quellas immissiuns duein vegnir cumpensadas
cun ina contribuziun voluntaria dils participonts e cun ina contribuziun digl organisatur.