News-Details

Giacun Hasper Muoth e sogn Placi„

05.07.2019

(anr/sb) Dumengia proxima, ils 7 da fenadur vegn commemorau ils patruns dalla claustra da Mustér sogn Placi e Sigisbert. Quei gi da fiasta cun perdanonza festiva ha ina liunga tradiziun e vegn schon festivaus dapi tschentaners. Ella historia dalla litteratura romontscha ha quei eveniment era svegliau interess, en special tier  Giacun Hasper Muoth (1844–1906), il poet da Breil. En siu idil «Il Gioder» descriva Muoth sias impressiuns dalla fiasta, per part era cun in tun criticironic ch’ei remarcabels per quei temps: «Sontgadats e paders e prers e pievel snueivel/Passan la via, descendan las pradas e muntan la spunda». La relaziun culla religiun ei tier il prencipoet ambivalenta ed ordvart cumplexa. Il Gioder, la persuna principala, observa quella fiasta desinteressaus e senza igl anim religius ch’ins spitgass forsa. Pli fetg eis el interessaus d’anflar ina spusa, tgei che semuossa ordvart difficil cun sias aultas pretensiuns...

«Ussa di, co has ei culla religiun?»
Giacun Hasper Muoth e sia relaziun ambivalenta cul catolicissem

DA SANDRO BUCHLI / ANR„«Nun sag, wie hast du’s mit der Religion? Du bist ein herzlich guter Mann, allein ich glaub, du hältst nicht viel davon.» Quei damonda la Margarete a Faust ella bein enconuschenta ovra da Goethe e per ella ei la risposta decisiva. Igl ei ina damonda ch’ins havess era bugen tschentau al  prencipoet da Breil Giacun Hasper Muoth (1844–1906). Sia relaziun culla religiun sa vegnir definida sco ambivalenta. Naturalmein eis el carschius si en in ambient catolic sco ei regeva prevalentamein ella Surselva dil 19avel siècle. Mo in’egliada en sias ovras tradescha ina tenuta ironic-critica evidenta enviers damondas dalla baselgia sco igl ei buca dad anflar tier biars auturs sursilvans da lezzas uras ch’eran a  medem temps savens era spirituals e ligiai vid in codex catolic: Seigi quei testas sco pader Maurus Carnot e tut ses discipels dalla romantica.

De sogn Placi

«De sogn Placi» ei il tetel dalla tiarza part digl idil legendar «Il Gioder» (1886). Ei setracta da 283 hexameters che reveleschan dapli davart la damonda schebein Muoth ei era in poet religius. Quella damonda ha era fatschentau il contemporan Flurin Camathias (1871–1946), concludend:  «Muoth porscha mo il maletg realistic dellas caussas terrestras. El lai sura al lectur de patertgar lundergiu, sco el vul. Pertratgs pli profunds e grondas ideas ha el buca per moda de vestgir en sias poesias.»

Gioder, la figura principala e fegl dil Mistral, essend «en retard» cun l’amur, enquera la dunna da sia veta e spera d’anflar quella alla fiasta commemorativa dil Sogn Placidus e Sogn Sighisbertus a Mustér. Sia predilecziun da dunnas ei ord perspectiva hodierna forsa empau «speciala» e certamein antiquada: El enquera ina dalla scola veglia che sa aunc cuschinar las tschaveras tradiziunalas sco veschlas, vermets e patlaunas. Quei tip cun «cumplex ödipedals che maridass il pli bugen sia mumma» (Viola Cadruvi) ei en general in grond adversari dil modernissem, dallas «novas triaccas» che paran dad invadar il Grischun la tiara dalla Cucagna.

Culs patratgs ellas neblas contempla el il pievel seradunaus a caschun dalla  fiasta. Pils usits e rituals catolics sempiterns ha el pauc danvonz: Gioder snega dad ir en processiun e cantar litanias, da purtar ina reliquia e va pli bugen «culs pagauns» silla spunda dil rieven per contemplar ed observar tgei che cuora e passa: Ils honureivels e meriteivels magnats dalla Cadi ornai cun «cruschs, cafanuns, baldachinsche terlischan, semovan, sgolatschan passan sperasvi»; las «sontgadads» da paders e prers, tenend enta maun la monstronza e sil tgau la monumentala «gnefla doradade sogn Sighisbertus». Igl entir carneval da dumengias vegn accumpignaus acusticamein da «nundumbreivels suspirs e vuts de pucconts e puccontas e da «nundumbreivels babnoss e canzuns de laud e legria», che sgolan a tschiel copulai ed uni culla messa cantada». Sia descripziun da quei act solemn da honorar ils fundaturs dalla claustra ei exagerada e la cumbinaziun da plaids ord registers bass sco «copular» ni «gnefla» en in context strictamein religius portan alla glisch la critica al persunal da Diu giu sin tiara: il suadetschdils ustiers ed ils suspirs dils carteivels occupan gest aschi fetg l’attenziun dil Gioder sco la moda, las tschaveras, las dunnas.

«Buc in sogn ch’ins metta sils altars»
La critica enviers la baselgia e sia forza normativa silla societad che vegn intonada en quella poesia sa era vegnir legida sco autobiografica. Muoth ha enconuschiu ina dunna ed ha giu in affon, dapli ei buca documentau. Sias visetas en u strias e pentas han pli probabel surmuntau il diember da quel da survetschs divins en baselgias e catedralas. «Schege ch’el ei buca in sogn, ch’ins metta sils altars, sch’eis el tonaton restaus fideivels alla baselgia catolica tochen silla fin», manegia igl augsegner Camathias en sia laudatio postuma – igl ei la fin finala ina menda ch’ins sa tralaschar – buca sco la Margarete tier Faust – en vesta da siu opus meisteril. L’amur per tradiziuns ha tuttina fascinau il historicher d’emprema classa Muoth. Siu «solegliv humor» e sias habilitads miraculusas sco poet han conquistau ils cors da lecturas e lecturs, tochen oz.

Dumengia ils 7 da fenadur vegn festivau sogn Placi a Mustér. L’entira poesia «Il Gioder. Ina cantada sur fatgs de cuschina dedicada a nossas caserinas, mo senza malart (1886)» ei d’anflar ellas Annalas digl onn 1908.

Giacun Hasper Muoth

Naschius igl onn 1844 silla spunda sulegliva da Breil, sco fegl da Gion Mattiu e da Maria Monica Cristgina nata Tuor. Nubil e bab d’ina feglia a Minca. Scolas a Breil, Feldkirch, Mustér, Sviz. Studis a Friburg, Losanna ed a Minca. Suenter professur da historia, tudestg e lungatgs classics alla Scola cantunala da Cuera. Renum sco poet cun sias idillas «Las Spatlunzas» (1872), «A mesiras» (1896) ed «Il Gioder» (1886). El ei era s’occupaus cun damondas linguisticas e historicas. Aschia valeva el sco autoritad sil camp dalla historia grischuna medievala. Morts ei il «prencipoet» igl onn 1906 a Cuera.  
(Fontauna: Lexicon  I storic Retic).

De sogn Placi, en: Il Gioder (1886)

Oz celebrava Mustér la fiasta la pli populara,
Quella dils sogns patruns, ils emprems fundaturs della clau stra,Placi e Sighisbert, ils sogns eremits en Surselva.
Pievel immens, marcadonts e hermès, signerem e puraglia,
Paders e prêrs, devozius pelegrins e glieut de merveglias
Mavan e gnevan, stuschont e stillont per vias e streglias.
Roschas de glieut en seit populavan ustrias e pintas,
Ed ils ustiers suavan, current cun boccals e butteglias.
Ferm scadanavan ils zens dil convent, indicont ils uffezis,
E la baselgia teneva strusch la fuola de pievel.
Nundumbreivels suspirs e vuts de pucconts e puccontas,
Nundumbreivels babnoss e canzuns de laud e legria
Sgolan a tschiel copulai ed uni culla messa cantada.
Gioder, il spus scumbigliau, ei èra vegnius silla fiasta,
Stat impau distracts davos ina petga dil tempel,
Ura dentont siu rosari de bass culs pertratgs ellas neblas,
Senza laschar vegnir endament sia bocca lischada,
Batter il pèz contrit e far ina ricla perfetga.
Gie il stinau puccont banduna perfin la baselgia,
Senza haver seoffretg de portar ina sontga reliquia,
Snega ded ir en processiun e cantar litanias,
Va culs pagauns dina vart a mischun silla spunda dil rieven,
Per contemplar en ruaus dil pievel la liunga cadeina.
Zens e scalins e murtès scadeinan dentont e ramplunan,
Cuolms e valls ed uauls rabattan sinsu e fracassan;
Cruschs, cafanuns, baldachins terlischan, semovan, sgola tschan;
Sontgadats e paders e prêrs e pievel snueivel
Passan la via, descendan las pradas e muntan la spunda,
Fan lu in paus; e ’gl avat devozius, entameun la monstronza,
E sin tgau la gnefla dorada de sogn Sighisbertus,
Dat la benedicziun al pievel Christifideivel.
Giest e puccont sefierra giun plaun, adoront il misteri.
Zens e scalins e murtès rabattan puspei e fracassan,
Millis echos digl uaul rispundan, fagient harmonia.
Èra il Gioder ha fatg sia crusch e detg «mea culpa»;
Mo, levaus sin peis, observa siu êgl de musteila
Denter las femnas, che vegnan suenter en liunga cadeina,
Certas persunas, che paran agli empau de fasierlias.
Denter schubas e gieppas de ponn e rassas mongola,
Vels, casavaicas, capetschs e capials, corsets e mantillas
Mavan spargliadamein duas giuvnas en teila grischuna:
Schlappas vali cun pizs e pindels e tschupi silla cuma,
Schubas e tschops de carpun e cadisch fullanaus alla grischa,In fazolet de seida rasaus lunsch giu pellas spatlas,
Ed in scusal merinò surcusius cun rosas e neglas.
Tut surstaus contempla nies mat la nova paretta,
Fuva quei gie citgei dischniesch en tala suita;
Vesa lu aunc, cun tgei devoziun e modesta preschienscha
Quellas giuvnas mavan leu, uront il rosari,
Vesa lu aunc, ch’igl ei matteuns de fina manonza,
E che las fatschas sappien strusch udir a vegliurdas.
Gioder suonda cun êgl pitgiv la roscha de femnas,
Ei talmein occupaus cullas giuvnas en teila grischuna,
Talmein surprius e scaldaus pellas veglias vertits ed isonzas,
Ch’el ni vesa ni auda pli citgei della pompa:
Vesa bucc il mistral de cumin, il sabi regenter,
Co quel vegn, paradont e smanont il manti de scarlatta,
Smeina siu tgau filosof e stenda la nobla statura;
Vesa bucc ils gieraus de cumin, sia nobla suita
D’humens perderts e giests, cussegliers e derschaders,
Datga bucca co ’i vegnan scurlont las stupentas barlaccas,
Datga bucc ils magnats de Mustér, las loschas slatteinas,
Co quels marschan portont il baldachin della claustra,
Fan sbargattuns e tegnan cun forza las astas;
Vesa bucc igl avat, tenent entameun la monstronza,
Accompognaus da paders e prêrs en ornats de parada,
Auda bucc las angelicas vuschs dils scolars e dils paders,
Repettent cun bass e sopran ils sogns responsoris,
Auda gnianc il grond cantadur, il Gilli Culeischen,
Co quel cont’in falzett, che susenta la vall ded Ursera:
Talmein fuva siu spert occupaus da caussas mundanas.
Bucca senza remiers sededesta Gioder finalmein,
Scrola siu tgau confus e fa cun bocca rienta:
Tgei pelegrin, che ti eis, o Dieus, mo seigi sco ’i vegli,
Quellas giuvnettas leu possedan empau calamita,
Lein mirar, e pi emprovar de scuvierer la caussa.
Gioder fuva turnaus el vitg, per ir a merenda,
Cura ch’el vesa puspei las giuvnas, vegnent pella via
En compagnia din um vegliurd, pusaus silla canna,
E passont sulla sava digl esch digl hôtel della Cruna.
Gioder suonda dabot ils vistitgs, decidius pella Cruna.
Fuolas de glieut sesevan ni stevan sin peis ell’ustria;
Gl era grev de sefultscher atras il pievel de fiasta,
Ch’encurreva cun breigia plaz, per semetter a meisa;
Era las giuvnas cattavan strusch ina dretga canorta.
Mo ’gl ustier vegn cheu en agit, arvent ina sala,
Nua ch’ils jasters èran pinai de far perdanonza,
Scheva si pil vegliurd: «Scrivon, fagiei sco ils auters,
E merendei ina gad’a tabla cun vossas fegliettas,
Custa quei ina vacca, sche ’veis de quellas avunda.»
Mo il vegliurd voleva ca leu e temmeva de spender;
Era las feglias fagievan ca nott e mussont il canaster:«Cheu havein nus de schétg e dovrassen mo la bubronda,
Mein nuidis puspei cun quellas raubas a casa.»
«Oh, sche dei il schambun als paupers, che vegnan a rogan!»
Schev’igl ustier e vesent il vegliurd uss il Gioder,
Stont damaneivel ded el e fagient ina tschéra de beffas,
Lai el seglir il puntilli e va per semetter a meisa.
Gioder suonda ses pass e tschaffa la suppia vischina.
Gia vegneva la servitit a current culla suppa.
Gioder havess bugient entschiet in discurs cullas giuvnas;
Mo il scrivont seseva sper el e fagiev’ina tschéra,
Sco sch’el fuss vilaus ni plitost enriclaus della spesa.
Mo havent ina feglia surviu al scrivont ina platta,
Pegl’il Gioder, strihont siu barbis, curascha d’entscheiver.
«Bien appetit»: fa el. «Engraziont», rispundan las giuvnas,
Er’il vegliurd marmugna citgei, sbrufflont ella barba.
«Suppa sogn Placi, ni bucc?» di Gioder cun pli gagliardia.«Na», replica la matta, «cheu maunca la vera mischeida.
Suppa sogn Placi consista ord giutta, arveglias e favas,
Cotgas en carn e cungidas cun schunscha culada.»
«Gie, de sogn Placi magliav’ins schiglioc la suppa castrada»,
Fa il vegliurd, «quei cheu ei rar, sco simpla panada.»
«Vus preferis, sco ’i para, scrivont, la veglia cuschina»,
Scheva Gioder, fagient ina tschéra impau diplomata.
«Tgei», sescauld’il scrivont, tenent il tschadun en ballon tscha,
«Leis vus forsa converter mei pellas novas triaccas?
Sun persuenter memia vegls, spargniei la suàda!»
«Gie, il bab ha raschun», remarcan las feglias en ina.
«Bucca temei!» di cheu il Gioder cun bocca rienta,
«Sundel èr’in amitg della veglia maniera de viver.
Latg e paun e caschiel, veschlems e carns ensaladas
Plaian ami bia meglier, che nossas spisas modernas.»
«Bien», marmugn’il vegliurd, laguttent giuaden la panada.
«Basta, sch’ins mira voss pugns e vossas vestas flurentas,
San ins avund’ed encorscha sil suc la buna galeida;
Esses èr ca nutri cun cafès e pelletschas de truffels.»
«Na», fa Gioder, scurlont il tgau. Il vegl en furtina:«Bien amitg, de miu temps, jeu sundel otgonta,
Fuva quei la metoda de trer e perver la casada:(...)