Sogn Martin, la fiera dalla Cadi

Igl uffeci da baghegiar ha d’organisar la fiera. Igl ei il sulet di che la via dil Lucmagn vegn serrada pil traffic motorisau. Naven dalla cruschada dil hotel Alpsu tochen tier quella dalla casa communala han ins astgau ir a spassegiond a mesa via. Dretg e seniester han ils stans envidau. «Tgau, co vai?», «Ditg buca viu!» ein discuors sesviluppai – gest tenor gl’intent dalla fiera s. Martin.

Cu il menader digl uffeci da baghegiar, Marco Tomaschett , e sia equipa han montau ils stans e semtgau l’infrastructura, plueva ei pulit ed ei ha pariu ch’ei detti in sogn Martin bletsch. Viers miezdi ei il tschiel sesclarius, il sulegl ha salidau e schizun scaldau empau. Sin gentar ha nuot pli reteniu da s’entupar e da tgirar ils contacts silla via dil Lucmagn. Sil suentermiezdi han ils scolars puspei astgau selegrar, pertgei els han mintg’onn liber. Cun quella isonza san las autoritads franc era contribuir che la generaziun giuvna tgira ed appreziescha vinavon il di da s. Martin. Gl’emploiau communal Roger Lutz ha giu la survesta dils stans. «En tut ein 42 occupai», ha el detg el discuors culla FMR. Aunc avon 20 onns separticipavan in bien ton dapli marcadonts agl impurtont di da fiera dalla Cadi. Era il puresser era lu aunc representaus meglier. Stans da rauba agricola, il stan da Giachen bienmarcau ed auters pils basegns da purs e pervesiders, fagevan bunas fatschentas.

«Ina massa stans d’indigens ein puspei cheu, quei ei propi ina biala caussa», ha Roger Lutz commentau la preschientscha ch’ei semidada. Naven dalla Ludoteca Mustér, il club Lions, l’uniun La Pendenta han era persunas privatas rimnau daners per projects da different gener. Apiculturs culla raccolta dalla stagiun, glieud creativa cun decoraziuns ed il commerci da detagl cun stizun ella vischinonza ein vegni en via per tschintschar e cussegliar. Tgi ha vendiu e tgi offeriu per ina buna ovra. Singuls commerciants ein vegni sur il Lucmagn el vitg claustral. Els han purschiu products mediterrans e rendiu attent alla veglia tradiziun da fiera. Ils producents e marcadonts indigens han secapescha in cert avantatg. Era las instituziuns ein stadas presentas: la Casa Depuoz e la Casa Puntreis han giu caschun d’entrar en contact culla populaziun. Ins ha constatau ina mischeida equilibrada da rauba e survetschs. (fmr/abc)