Ina GIE ed in NA a Mustér

Martin Gabriel/FMR

Il suveran da Mustér ha refusau claramein ier dumengia cun 68 % dallas vuschs il credit dad 1,85 milliuns francs per renovar la Via Cons. Sco quei ch’il president communal René Epp ha detg cuort suenter ch’il resultat era enconuschents, hagi la suprastonza supponiu sin basa dallas discussiuns dallas davosas jamnas, ch’ei savessi vegnir grev per la Via Cons. «La suprastonza communala accepta secapescha quei clar resultat. Nus vegnin ussa ad ir sur ils cudischs e mirar co nus vulein proceder vinavon cun la Via Cons.» Sco quei ch’il president communal ha puntuau enviers la FMR stoppi la Via Cons vegnir sanada: «Quei munta che nus stuein far in niev project e purtar quel ton pli spert. La sanaziun da quella via ei urgenta ed il project vegn buca pli favoreivels cun spitgar.»

Ils parcadis ed il mir dil santeri

La sanaziun dalla Via Cons è stada dispiteivla perquei che la vischnaunca vuleva gest prender la caschun da midar ils parcadis denter la scola e la baselgia sin l’autra vart dalla via. Aschia havessi ins saviu crear in spazi da sentupada sil santeri. Ils adversaris eran dall’idea che quei seigi buca raschuneivel. La Via Cons sappi ins renovar cun dameins daners. Igl anteriur president communal e deputau Aldo Tuor ha capientscha per tut quels ch’ein stai sceptics enviers quei project. «Jeu sun ferm perschuadius ch’il mir dil santeri sto restar sco quei ch’el ei perquei che aschia fuorman santeri e baselgia ina unitad. Jeu sperel che la suprastonza communala traigi las dretgas conclusiuns ord il resultat dalla votaziun e presenti beingleiti ina nova soluziun per la renovaziun dalla Via Cons.»

L’ovra solara Magrielha gudignau la secunda votaziun

Sco secunda fatschenta ha il suveran da Mustér acceptau cun in surpli da 36 vuschs che han detg GIE il contract pil dretg da baghegiar l’ovra Magriel tranter la vischnanca e l'Ovra Solara Magriel SA. Il president communal René Epp discuora d’in resultat fetg legreivel. «Cheu vegnin nus in pass vinavon e savein il matg proxim inoltrar la damonda da baghegiar.» Il GIE dil suveran all’ovra solara Magriel muossi che la vischnaunca da Mustér seigi aviarta per pass innovativs e futuristics. «Quei ch’ins astga secapescha buc emblidar ei che l’ovra Magriel porta entradas fetg impurtontas alla vischnaunca ed era avantatgs per las pendicularas da Mustér.»

«Igl ei buca pli il project oriund»

Cunquei ch’ils panels dall’ovra Magriel dovran dapli plaz e perquei ch’ils planisaders han stuiu excluder ina zona per motivs d’ambient, munta la surfatscha totala ussa 140 000 meters quadrats enstagl da 98 000 meters quadrats. In dils adversaris dall’ovra solara Magriel ei il cusseglier communal da Mustér Rafael Maissen : «Il project engrondiu e la pli bassa prestaziun fotovoltaica ei stau in motiv per esser encunter il project. Jeu haiel denton era detg na perquei ch’ins baghegia quell’ovra gest sper la pista da skis.» El accepti secapescha la veglia dil suveran da Mustér, ha Rafael Maissen detg alla FMR. «Il tema ei liquidaus per mei, cunquei ch’il pievel ha priu in clar conclus. Mo jeu vegn a restar sceptics pertuccont las consequenzas ch’ils panels vegnan ad haver per la qualitad turistica el territori da skis.»

63,3 % dallas votantas e votants da Mustér ein separticipai vid las votaziuns communalas davart la Via Cons e davart l’ovra solara Magriel.