Moviment e sault ed in publicum incantau

Martin Gabriel/FMR

La noziun «Movis» munta nuot auter che moviment e sault. Fundau la gruppa Movis ch’ei dapi in onn ina subgruppa dall’Uniun da gimnastica Cadi ha la scolasta Esther Hendry-Decurtins . Ella ha tratg il carr cun grond engaschament duront biars onns. L’inizianta ha instruiu ils affons da differentas vegliadetgnas, e quei onn per onn naven digl atun entochen allas producziuns finalas l’entschatta d’avrel. Enteifer ils davos 19 onns ei la gruppa Movis carschida da camifo. La davosa fin d’jamna ein buca meins che 125 scolaras e scolars ed ina gronda gruppa da carschi seproduci sin tribuna cun saults e producziuns da gimnastica ed acrobatica.

La pagaglia ei igl applaus

La sala Cons era pleina e pli che pleina il venderdis sera vargau a caschun dalla emprema producziun finala da Movis 2024. Biars giuvenils, mo era geniturs, tats e tattas ed interessai da sault e coreografia han applaudiu suenter mintga singula producziun. Duront la stiva da café suenter las producziuns hai dau la pusseivaldad da reflectar e discussiunar.

Entschiet han entginas dunnas

Esther Hendry-Decurtins raquenta che l’historia da Movis hagi entschiet cun sault e gimnastica d’ina gruppa da tschun dunnas. «Quei ei iu entgins onns. Entginas han lu calau e nus restadas en duas. Aschia havein nus decidiu d’entscheiver cun gimnastica e sault pils affons dils vitg. All’entschatta era quei ina gruppa da scolaras e scolars da denter quater e dudisch onns. Igl era lu ina gruppa plitost pintga. Culs onns ei il diember denton carschius ad in crescher e nus havein stuiu haver dapli menadras.» Entochen avon in onn seigi Movis stada ina gruppa privata, di Esther Hendry-Decurtins. Dapi 2023 seigi ins integraus ella Uniun da gimnastica Cadi sco gruppa en la sparta da sault.

L’auter onn ei fiasta da 25 onns.

Gia pil 20avel onn havevan ils Movis preparau in program da giubileum. Quel ei lu denton daus ell’aua pervia dalla pandemia. Esther Hendry-Decurtins di, ch’ins hagi suenter la pausa entschiet da niev e seprepari ussa cun slontsch per ina producziun empau pli speciala pil 25avel onn d’existenza da Movis Mustér. Las producziuns da giubileum hagien liug l’entschatta d’avrel 2025. Cun in sguard sin las producziuns dalla davosa fin d’jamna san ins dir, che la situaziun da partenza per il grond giubileum ei ideala.

Affons da Breil entochen Tujetsch

Sco la menadra Esther Hendry-Decurtins di separticipeschien affons e giuvenils da Breil entochen Tujetsch dils Movis. Ella ei optimista e perschuadida che la purschida dils Movis ei da grond’impurtonza: «Nus lessen porscher zatgei per vegnir sin auters patratgs. Mo lu era per far zatgei communablamein pil tgierp. Enteifer las gruppas sedattan era impurtonts contacts che semantegnan era suenter l’activitad els Movis.» Impurtont seigi ei gnanc cons che selaschien inspirar da quell’activitad, mobein che quels, che separticipeschien, hagien plascher. Ed alla fin finala renda la menadra attents che tier Movis tgiri ins ina impurtonta regla da cumportament; quella da tractar in l’auter cun respect.

Las fotografias anfleis Vus cheu.