News-Details

Students dalla China fan la matura a Mustér

12.03.2015

Il project che tegn quen dalla tradiziun multiculturala dalla claustra vegn realisaus ensemen cun la Fundaziun svizra «Bildungsanker». Quella vul possibilitar a gimnasiast(a)s ambiziunai dalla China da studegiar a Mustér ed absolver cheu la matura. Cheutras seporscha allas scolaras ed als scolars dil gimnasi e lur magisters la pusseivladad d’in brat cultural internaziunal. Ton igl avat Vigeli Monn sco il rectur Bruno Hensler taxeschan quei pass per impurtonts pils scolars dalla China, mo era pils agens. Els sappien profitar in da l’auter e da lur culturas, era en vesta a lur avegnir. Il president dalla fundaziun, Zen-Jiang Wang, ei staus sez scolar dil gimnasi a Mustér. Avon biebein 40 onns ha el absolviu cheu in cuors da tudestg. Il project cun scolars dalla China vegn accumpignaus d’in ulteriur anteriur scolar dil gimnasi da Mustér, Andreas Kühnis. El accentuescha igl interess dils Chines da laschar scolar lur affons egl exteriur. Las scolaras ed ils scolars derivan oravontut dallas regiuns da Beijing, Nanjing e Shanghai. Per sepreparar linguisticamein pil gimnasi a Mustér, vegnan els ad absolver la stad in cuors intensiv da tudestg. Zen-Jiang Wang quenta che ulteriurs giuvenils dalla China vegnien ils proxims onns per studegiar e far la matura a Mustér. El quenta cun in diember annual da tschun entochen diesch dels.