News-Details

Ils responsabels pil Program San Gottardo 2020 han orientau a Mustér

11.06.2015

La finamira dil Program San Gottardo 2020 ei d’augmentar las pusseivladads da concurrenzabladad e da plivalur dalla regiun che cumpeglia la Surselva, Ursera, Goms e Tre Valli. «Quei tuna fetg general. Concretamein duei il project migliurar ed optimar la collaboraziun turistica, vul dir las structuras e las organisaziuns sco era promover l’infrastructura ed ils products dils acturs locals, gidond a sviluppar e commercialisar quels. Leutier s’audan era impuls en favur dall’identitad e l’atgna iniziativa», di il meinaproject dil program Marc Tischhauser.

Susteniu plirs projects
Il Program San Gottardo ei en funcziun dapi biebein siat onns. Cun occasiun dalla sentupada d’informaziun la mesjamna suenter miezdi ella Sala Peter Kaiser a Mustér, ha il collaboratur dil project, Simon Coray, dau plaid e fatg davart il succediu. Aschia ei vegniu susteniu en quei temps differents projects sco per exempel la senda dallas quater fontaunas, il mund d’aventuras Sasso San Gottardo, il caschiel da San Gottardo ni era il sport da golf ella regiun dil San Gottardo. Ulteriurs projects ein en elavuraziun. Aschia per exempel Bike San Gottardo ni era igl eldorado dallas vias dils pass sco era il project Nordic San Gottardo. La finamira dil project nordic ei da formar ina regiun da cuorsa liunga da renum mundial. Per quei project ha il Program San Gottardo 2020 elavurau ina strategia e mesiras concretas communablamein cun ils acturs locals e cun la Scol’aulta professiunala Berna. Il project duei vegnir realisaus l’auter onn. Per quei intent eis ei previu d’investar varga otg milliuns francs. La finamira dil project da velo ei da nezegiar il potenzial che la regiun porscha sin quei sectur en cumbinaziun cun il traffic public.

Ina reit agricola
Tenor informaziuns dils responsabels dil Program San Gottardo 2020 marscha il mument era in project sil sectur dall’agricultura. La finamira da quel ei da rinforzar la reit e da promover il commerci dils products. Plinavon ei vegniu realisau ina nova homepage sco era ina nova marca per la regiun. Ils dus instruments duein gidar a far enconuschents ils projects surregiunals ed ils products. Aschia portan els il medem adressader ed ein aschia elements dil marketing dils acturs locals. «La regiun ha ina gronda plattafuorma. Ussa ha ei denton num da derasar pli fetg la marca», puntuescha Marc Tischhauser. Entochen ussa ei la marca San Gottardo vegnida nezegiada denter auter per la broschura dalla senda dallas quater fontaunas, il caschiel da Caseificio Dimostrativo del Gottardo SA ni era tier las presentaziuns dils cantuns dil San Gottardo all’Expo Milano.

Aunc biaras finamiras
Marc Tischhauser ha era tratg bilanza la mesjamna suenter miezdi dallas finamiras fixadas oriundamein: «Nus havein gia realisau bia. Tuttas finamiras ein denton buca vegnidas contonschidas.» Bia drovi temps, per exempel la collaboraziun e la reit enteifer ils cantuns dil San Gottardo. «Quei ei in process da generaziuns», constatescha il meinaproject. Per quei motiv duei il Program San Gottardo vegnir prolunghius per quater ulteriurs onns, damai che la perioda dalla nova politica regiunala dalla confederaziun va a fin 2015. Quei vul dir che la finanziaziun croda medemamein la fin da quest onn. Entochen la fin digl onn elavureschan ils quater cantuns communablamein cun la confederaziun in niev program da realisaziun 2016-19 pil Program San Gottardo. La finamira ei da dumandar ulteriurs 70 milliuns francs. Ils davos quater onns han confederaziun e cantuns giu concediu 85 milliuns francs. Il proxim temps vegn seconcentrau sils projects currents. «Ei ha num realisar tut quei ch’ei mess sin via. Las resursas dalla regiun ein limitadas e ston per quei motiv vegnir concentradas e focusadas per aschia haver in effect», di Marc Tischhauser.