News-Details

La collaboraziun ei da reglar immediatamein

14.10.2015

En rama dil conclus davart la „Nova politica regiunala dalla confederaziun – program da realisaziun San Gottardo 2016-19“ ha il cantun sincerau mieds finanzials per la regiun sisum la Surselva. En quei connex ha la regenza denton era fatg claras pretensiuns: „Dallas vischnauncas da Mustér e Tujetsch vegn spitgau ina cuntinuaziun dalla collaboraziun turistica che porscha era sinergias alla Regiun Surselva ed al territori dil Gottard.“ Sco quei ch’il departament constatescha, ein quellas cundiziuns buca dadas il mument. En vesta a quella situaziun, mo era ils problems che setschentan sisum la Surselva en connex cun il svilup economic, fa il departament d’economia publica e fatgs socials dil cantun Grischun differentas, claras pretensiuns allas duas vischnauncas, l’organisaziun turistica ed ils purtaders dil turissem.

Cuntinuar cun collaboraziun
Tenor il departament che vegn menaus da cusseglier guvernativ Jon Domenic Parolini, duei la collaboraziun dallas vischnauncas da Mustér e Tujetsch succeder ad interim sin basa dalla cunvegnientscha da prestaziun valeivla ensemen cun Sedrun Mustér Turissem. Ina eventuala adattaziun da quella stoppi vegnir discutada ladinamein denter ils partenaris. Omisduas vischnauncas han da prender immediatamein mesiras per segirar la purschida turistica, senza ch’ils purtaders da prestaziun pertuccai piteschien dalla situaziun actuala. Medemamein ein mesiras a cuorta vesta da realisar per segirar la collaboraziun cun partenaris sco per exempel Svizra Turissem. La vischnaunca da Tujetsch ha da s’engaschar ladinamein en favur dalla collaboraziun cun la vischnaunca da Mustér, las pendicularas d’Andermatt/Sedrun e Mustér en connex cun la basa dalla planisaziun per las decisiuns davart las investiziuns ella colligiaziun dil territori da skis da Mustér-Sedrun.

Colligiaziun da tariffas
Dallas pendicularas dad Andermatt/Sedrun e Mustér spetga il departament d’economia publica e fatgs socials dil cantun immediatamein discuors concernent ina colligiaziun da tariffas. Per impedir che la concurrenzabladad, respectivamein l’attractivitad dallas duas vischnauncas piteschi, ei la collaboraziun sin differents secturs d’examinar criticamein. Il departament patratga en quei connex vid la planisaziun dil territori, il svilup dils loghens sco era projects intercantunals sco per exempel da velo ni nordic. En vesta alla finanziaziun d’infrastructura turistica setschenta era la damonda davart la segirtad dils emprests dalla confederaziun alla ASS SA. En quei connex spetga il departament dallas vischnauncas da sclarir ils conclus ch’ein da prender (garanzia communala), aschilunsch che las segirtads san buca vegnir garantidas dalla ASS SA.

In moderatur
Il departament d’economia publica e fatgs socials dil cantun ei promts da sustener vinavon il project San Gottardo. Persuenter spetga el denton igl engaschament e la stretga collaboraziun da tut ils pertuccai el liug. En vesta alla dimensiun da quella promoziun seigi ina tala indispensabla. Il departament propona als pertuccai d’engaschar in moderatur ni in team da moderaziun sco punct central denter las vischnauncas, l’organisaziun da turissem ed ils purtaders da prestaziun, per aschia saver accelerar il svilup. Il cantun seigi promts da sustener quella lavur. Il departament hagi tutta intenziun da gidar ad anflar ina buna soluziun. Per quei motiv seigi il departament promts per discuors denter las vischnauncas e l’organisaziun da turissem. Sco quei ch’il president da Sedrun Mustér Turissem, Curdin Brugger ha detg il mardis sin damonda dall’Agentura da Novitads Rumantscha, spetga l’organisaziun turistica ussa sin signals dallas vischnauncas: „Nus essan claramein dil meini ch’ei seigi da cuntinuar communablamein. Ei fa pauc senn da luvrar in sper l’auter ora.“