News-Details

Da s. Placi en nova tarlischur

13.06.2017

Sche l’aura fa neginas capriolas pli sa la claustra da Mustér presentar la fatschada restaurada dil sid dalla baselgia pil di che la fiasta da s. Placi vegn celebrada uonn. Ils davos meins ein las lavurs da restauraziun s’avanzadas bein. Ins ei bunamein s’endisaus vid il palancau e la tenda da schurmetg vid la fatscha dil sid dalla baselgia claustrala. Per la fiasta da s. Placi cun processiun ils 9 da fenadur 2017 duei quel denton esser demontaus. «Sche l’aura ei buna – vul dir schetga – savein nus far las davosas lavurs da ligiadura e pictura las jamnas restontas entochen s. Placi. Cun la demontascha dil palancau sez quintein nus biebein in’jamna. Nus essan optimists e quintein che nus sappien presentar la fatschada restaurada il di dalla fiasta da s. Placi», di Andreas Isler ch’ei responsabels per las immobilias ed ils projects da baghegiar dalla claustra da Mustér. Eventualmein pon las lavurs vid il sochel giudem buca vegnir finidas dil tut, vul dir buca coluradas. «Quei ei lavurs ch’ins sa finir era senza pli bia palancau», di Isler. En sesez era ei previu da terminar las lavurs da restauraziun dalla fatschada dil sid dalla baselgia da s. Martin igl atun vargau. L’aura plitost bletscha duront igl onn ora, mo era lavurs supplementaras han la finfinala pretendiu da schar il palancau entochen uonn. Il palancau vid la fatschada digl ost nua ch’ei vegn luvrau intensivamein vid la restauraziun resta pil mument. Las lavurs da restauraziun dalla baselgia claustrala cuntinueschan vid la fatschada externa e vegnan silsuenter cuntinuadas endadens. La restauraziun interna ei previda ils onns 2018 e 2019. Tut en tut ein ils cuosts per quei grond project calculai cun rodund 15 milliuns francs.