News-Details

Fiera da Nadal cun 45 expositurs

27.11.2017

Cun 45 exposituras ed expositurs ei la fiera da Nadal a Mustér la sonda vargada stada aschi gronda sco aunc mai. Quei ha secapescha plaschiu als numerus visitaders. La purschida ei stada varionta ed attractiva. Il temps dallas fieras d’advent e da Nadal ei puspei arrivaus. Las proximas fins d’jamna carmalan ellas buca mo els vitgs, mobein era en marcaus gronds. Ferton che la purschida dallas fieras da Nadal ellas metropolas ei daventada in spitachel e vera attracziun turistica cun calamita internaziunala han las fieras pintgas pli u meins salvau lur caracter familiar. Las fieras da Nadal els vitgs ein buca mo surveseivlas, ellas ein era caschuns da sentupadas da vischinas e vischins. Bein enqualin nezegia la caschun da s’entupar cun in ni l’auter ch’el ha daditg buca pli viu. Aschia ei quei era stau la sonda a Mustér. La fiera da Nadal 2017 ei vegnida arranschada dall’Uniun da dunnas Mustér. Ella vegn dil reminent organisada alternontamein a Mustér, en Val Medel e Val Tujetsch e quei entras las uniuns da dunnas. Aschia sedat negina concurrenza mintg’onn e l’organisaziun da silmeins ina fiera d’advent e da Nadal ei garantida en Sursassiala. Ultra dils products locals e regiunals ha la fiera da Nadal da Mustér era purschiu uonn tschupials, decoraziuns e cartas d’advent e da Nadal, candeilas e paun cun péra, puolpa e ligiongias sco era bellezia lavurs fatgas a maun. La fiera resplenda aschidadir la purschida dalla regiun, seigi cun lavurs specialas ni era products pil beinstar corporal. Dalla partida ein uonn era plirs commerciants d’ordeifer la regiun stai. Era uonn ei vegniu purschiu enzatgei special als affons. Quels han giu la caschun da zambergiar latiarnas e silsuenter da presentar quellas en in til. Sin plirs stans ei era vegniu s’engaschau caritativamein. Il recav ei ius denter auter a famiglias basignusas. L’aura ei – per cletg – buca stada aschi schliata sco prognosticada. Cun las temperaturas empau pli frestgas han ils expositurs e visitaders saviu viver. Il facit dallas duas responsablas per l’organisaziun Rita Huonder e Tina Bundi ei positivs: «Nus essan fetg cuntenzas cun la participaziun. Fetg bein secumprovada ei era l’idea d’extender la fiera vi sin la plazza da Puntreis.» Sin lur iniziativa ei era vegniu scaffiu e plazzau mobilias empau pli specialas sil plaz avon halla Cons. Ina part da quellas ei vegnida fabricada ord panos digl indigen Battesta Schmed.