News-Details

Campiunadi cun biebein 100 participonts

03.08.2018

DA HANS HUONDER / ANR
Per in’ulteriura ga organiseschan ils Surselva Flaigers ensemen cun l’Uniun Disentis Open il campiunadi svizzer da parasgular. Biebein 100 participontas e participonts – per part era digl exteriur – semesiran l’jamna vegnenta a quella concurrenza naziunala. Il club dils parasguladers Surselva Flaigers che dumbra biebein 40 commembras e commembers ei s’etablius ell’organisaziun da concurrenzas. Ils arranschaments purschi regularmein ils davos onns han era dau dabia rutina als organisaturs. Quei san ils responsabels sin plaun naziunal e per quei motiv vegn la regiun dalla Surselva lu adina puspei era risguardada per concurrenzas. «Tier nus ein las cundiziuns da sgular optimalas e quei levgiescha naturalmein l’organisaziun sco tala», di Marc Demont da Mustér che presidiescha il club dapi rodund treis onns. La regiun ha in excellent num per sias pusseivladads da sgol cumbinadas cun bia variaziun e selecziun. Da cheu anora eis ei pusseivel da far partenzas a sgols pretensius. Da bunas cundiziuns meteorologicas eis ei pusseivel da sgular entochen ella Purtenza, Tavau ni ella Valrein da Cuera. Igl onn vargau han ils Surselva Flaigers e l’Uniun Disentis Open saviu encorunar lur grondas stentas d’organisar arranschaments da parasgular. Lu ha numnadamein giu liug per la secunda ga sisum la Surselva ina dallas tschun concurrenzas dil Cup mundial. 130 parasguladras e parasguladers digl entir mund ein separticipai a quei arranschament internaziunal.
Excellents parasguladers
Al campiunadi svizzer ch’entscheiva damaun cul trenament semesiran biebein 100 parasguladras e parasguladers. Buca tuts ein Svizzers. Era plirs d’autras tiaras ein dalla partida. Ils parasguladers svizzers s’audan tier ils megliers dapi entgins onns e quei ei secapescha ina buna caschun pils auters da semesirar cun quels. Naven da dumengia vegn fatg mintga di in sgol da concurrenza aschilunsch che l’aura lubescha quei. Tenor Marc Demont setracta ei da sgols denter 50 e 120 kilometers: «Sch’ei va enzaco lein nus era fixar in sgol entochen e cun arrivada en Purtenza.» La partenza sco tala ha liug mintga ga a Gendusas a Mustér e pil pli vegn l’arrivada ad esser ella vischinonza dil vitg. Il pensum – igl aschinumnau task – vegn communicaus allas participontas ed als participonts mintgamai la damaun. «Quel sto secapescha vegnir fixaus cun risguard dall’aura», di Marc Demont. La partenza ei lu mintgamai cuort avon miezdi. En lur stentas da porscher
quei campiunadi svizzer vegnan las organisaturas ed ils organisaturs susteni dallas Pendicularas Mustér SA sco era d’in tschuppel commembers voluntaris dils Surselva Flaigers, l’Uniun Disentis Open e Vol Liber Grischun. Tut en tut drova ei rodund 30 persunas per garantir in bien andament dil campiunadi svizzer. Leutier
s’auda era glieud scolada per exempel els fatgs samaritans ni dil seracass.
Risguard dalla selvaschina
Sco quei che Marc Demont ha detg enviers l’Agentura da Novitads Rumantscha han ils organisaturs era anflau uonn cumpromiss cun la survigilonza da catscha pertuccont zonas serradas pil sgol. Che talas mesiras ein il mument necessarias san ins era leger sin la homepage dils Surselva Flaigers. Dapresent ein talas mesiras necessarias oravontut pervia dalla tschoccadad da camutschs. La malsogna caschuna dapi in temps sperditas d’animals sisum la Surselva. Per quei motiv ston las parasguladras ed ils parasguladers evitar da sgular en ina zona che sestenda dall’Alpsu entochen al Péz Cavardiras. Camutschs e capricorns pertuccai dalla malsogna reageschan sensiblamein sin disturbis. Tals san spuenter ils animals e la fin finala san quels curdar alla mort.