News-Details

Da Mustér egl univers

22.10.2018

anr/ac) Il vendergis vargau ha ina delegaziun dalla Scola professiunala da Cuera visitau
la Distec SA a Mustér.
In’interpresa che tschenta gronda peisa sin la formaziun dad emprendistas ed emprendists per segirar al menaschi persunal dil fatg. Menaschis industrials el spazi alpin ein rars e las sfidas da semantener en ina fiera globala grondas. Segirar ad in tal menaschi persunal dil fatg ei indispensabel per puder producir sin in ault nivel da qualitad. Perquei investescha la Distec SA dabia potenzial ella scolaziun dad emprendistas ed emprendists oriunds dalla regiun. E porscha ad els suenter igl emprendissadi sche pusseivel in contract da lavur. Dapi sis onns ei Marcus Jacomet responsabels per emprendistas ed emprendists enteifer la Distec SA ed il vendergis vargau han el e Pierino Bisquolm astgau beneventar per l’emprema ga a Mustér ina delegaziun dalla Scola professiunala da Cuera.

(anr/ac) La scolaziun dad emprendistas ed emprendists gauda ina gronda impurtonza enteifer il sulet menaschi industrial en Surselva. Ella segirescha alla Distec SA la successiun da forzas da lavur dil fatg. Il vendergis vargau han scolasts dalla Scola professiunala da Cuera visitau il menaschi a Mustér. Dapi sis onns ei Marcus Jacomet responsabels enteifer la Distec SA a Mustér per la formaziun dad emprendistas ed emprendists. Actualmein ein buca meins che 17 emprendistas ed emprendists engaschai e fuorman in’impurtonta part dils biebein 70 emploiadas ed emploiai dall’interpresa. La gronda part d’els sesanflan ella scolaziun da polimecanist che cuoza quater onns ni mecanist da producziun cun treis onns scolaziun. Plascher ha Jacomet ch’Alessandra Capaul ha, sco emprema giuvna, terminau igl emprendissadi da polimecanista. E l’interpresa ha pudiu porscher a tuts tschun emprendists ch’han terminau la formaziun professiunala tier la Distec in contract da lavur. D’attribuir ei quei fatg als buns affars digl onn current cun in bienton meglieras incaricas da lavur, sco quei ch’il directur dalla Distec SA Loris Marsura ha accentuau. El ha plidentau la grond’impurtonza dalla formaziun dad emprendistas ed emprendists per segirar alla Distec las forzas da lavur dil fatg garegiadas. In polimecanist dalla Bassa ei buca da perschuader da vegnir en Surselva a luvrar. Tonpli necessaria ei la scolaziun dad agen persunal. Persunal che deriva digl intschess da Glion entochen Sedrun. La concurrenza el sectur dall’elavuraziun da precisiun da metal ei gronda e gest las interpresas ell’Europa digl ost concurrenzeschan cun prezis bass. «Sur da qualitad stuein nus buca discutar, quella ei in absolut stuer.» Marsura sesprova da mantener la habilitad da concuorer cun la cumpra da material enteifer la holding, alla quala la Distec appartegn. Tgirar buns contacts cun la clientella e filar contacts cun nova entras ina persuna incaricada dad acquistar lavur. E flexibilitad, la Distec SA posseda ina lubientscha dil cantun da luvrar sondas e dumengias sch’ei fa da basegns.

Fideivels collaboraturs
Menziunau ha Marsura ils fideivels collaboraturs dalla Distec SA ch’enconuschien il menaschi e garanteschien ina buna lavur entras lur gronda experienza. E tiels luvrers cun gronda experienza appartegn Marcus Jacomet. El terminescha sia lavur per la Distec SA suenter in engaschi da 51 onns la fin digl onn e va en pensiun. El ha entschiet sco luvrer antruras aunc tier la Landis&Gyr, ha surpriu responsabladad sco menader da partiziun e la finfinala ils emprendists. Jacomet enconuscha la historia e las midadas enteifer il sulet menaschi d’industria en Surselva sco paucs auters. La lavur sco tala ell’interpresa valetescha el per pli intressanta e varionta ch’antruras tier la Landis & Gyr. Daco che quei ei aschia ha ina viseta tras la singulas partiziuns mussau. Marcus Jacoment e Pierino Bisquolm han menau il vendergis vargau ina delegaziun dalla Scola mercantila da Cuera tras il menaschi. Ils scolasts ch’instrueschan denter auter era emprendistas ed emprendists dalla Distec SA. Dapi tschun onns visetan ils scolasts ils loghens da formaziun da lur scolars per prender investa dalla lavur da mintgagi dils emprendists. Jacoment e Bisquolm han purschiu in’interessanta investa el
menaschi.

La maschina drova la survigilonza humana
Lavur manuala ei rara en las hallas da producziun dalla Distec SA, grondas maschinas automaticas surprendan la lavur dad elavurar metal ni materia sintetica. Senza la survigilonza e programmaziun dil carstgaun e sias enconuschientschas dil process da lavur fa la maschian buca siu duer. La tocca che banduna la producziun ei per part dètg filigrana. Ella survescha alla tecnica medicinala, industria d’aviuns ed auter, tocca elavurada ella Distec SA a Mustér ei gia sgulada cun la racheta Arianne egl univers. Buca sulet tocca vegn elavurada, mobein entiras cumponentas montadas els stabiliments dall’interpresa. Cumponentas che ston vegnir controlladas e confirmadas da funcziunar scosauda avon che bandunar la Surselva. Ina partiziun climatisada ei equipada cun mieds da mesirar moderns. In’exacta organisaziun naven dalla producziun dalla singula cumponenta entochen tier la spediziun ei indispensabla. Plascher ha Jacoment giu dalla viseta dalla scola professiunala, in novum en sia liunga carriera el menaschi industrial a Mustér. El e Bisqu1olm han buca tralaschau da mussar alla viseta da Cuera las lavurs d’exercezi dad emprendistas ed emprendists. Lavurs da tut gener e dad aulta qualitad.