News-Details

Fiasta dall’emprema sontga communiun

08.10.2020

Fiasta dall’emprema sontga communiun

(fmr/ff) Ils scolars e las scolaras dalla tiarza classa da Mustér han ditg stuiu spitgar sin quei di. La dumengi’alva ch’ei fixada sin las dumengias suenter la fiasta da Pastgas ei stada l’unfrenda da covid-19 e sias restricziuns. Uss, il settember ed october, ha igl impurtont eveniment saviu vegnir menaus atras, la dumengia vargada era ella pleiv sogn Gions.

Tschentar il cumpass

Ina nav, las palas da remar, il cumpass, la bibla ed in’ancra han ils premcommunicants tschentau sco simbol sper igl altar. In rin da salvament dat segirtad supplementara als navigadurs. El priedi ed ellas funcziuns ch’els han sezs celebrau han els empermess da conduir il pign bastiment da cuminonza el dretg port. Els san sefidar sin lur capitani, Niessegner, ed ein perschuadi ch’el meini els en la dretga direcziun. Sur Mathew Kurian e la catecheta Corina Defuns han accumpignau ils affons duront igl onn entir e fullau la via a quei eveniment impurtont per els. Quei sogn sacrament dat als premcommunicants la segirezia dad esser maiorents en lur perschuasiun religiusa. Duront la preparaziun han els astgau retscheiver la penetienzia en in discuors persunal cugl augsegner. Ils quendisch affons han envidau lur famiglias alla fiasta. La baselgia sogn Gions a Mustér ei aschia s’emplenida e sepresentada en ina rama zun festiva. Alla fin dallas funcziuns han ils premcommunicants exclamau cun ferma vusch in «gie, nus turnein en baselgia»!