News-Details

Il pei da taglia en votaziun

20.09.2021

HANS HUONDER/FMR

Il pei da taglia en votaziun
Avon 13 onns ha Mustér alzau il pei da taglia da 105 sin 120% ed uss duei el vegnir reducius per diesch pertschien. Dumengia decida il pievel davart quella reducziun. La suprastonza communala haveva proponiu al cussegl da vischnaunca ina reducziun da tschun pertschien, lez ei staus dil meini che diesch
pertschien seigi indicau. Quella correctura s’effectuescha el quen communal cun in minus da rodund 340 000 francs. Per la suprastonza communala ei quei memia bia en vesta allas investiziuns ch’ein da far. Mustér preveda d’investir 26 milliuns francs ils proxims onns. Il cussegl da vischnaunca ei dil meini
ch’ina vischnaunca che vul esser cumpetitiva, sto era haver in pei da taglia attractiv. (fmr/hh)

Ina reducziun da tschun ni diesch pertschien?
Dumengia proxima decida il pievel da Mustér davart ina reducziun dil pei da taglia da diesch pertschien. Vegn quella proposta dil cussegl da vischnaunca acceptada, ein las autoritads communalas sfurzadas da spargnar, vul dir da far il pass suenter la comba. Il cussegl da vischnaunca ei dil meini che quei seigi pusseivel, la suprastonza communala havess beneventau ina reducziun da sulettamein tschun pertschien.

Sper Mustér han sulettamein aunc Flerden, Masein, Aschera, Tschiertschen-Praden e Val Müstair in pei da taglia da 120%. Bravuogn Filisur
e Furna in tal da 130%. Cun quei s’auda Mustér tier las otg vischnauncas cul pli ault pei da taglia el cantun Grischun. Tuttas autras han in pli bass, per part schizun mo tals da 30 ni 50%. Quei vulan las autoritads communalas da Mustér midar. La suprastonza communala haveva proponiu al cussegl da vischnaunca ina reducziun da tschun sin 115% cun analisar ils proxims onns la situaziun ed allura eventualmein far in ulteriur pass da tschun pertschien. Il cussegl da vischnaunca ei denton staus dil meini ch’ina reducziun da diesch pertschien seigi indicada suenter ch’ins haveva decidiu d’alzar il pei da taglia avon 13 onns da 105 sin 120% .

Il temps ei madirs
Il cussegl da vischnaunca ei segirs: Ina vischnaunca che vul esser cumpetitiva drova in pei da taglia attractiv. Per contonscher quella finamira duein las investiziuns previdas vegnir priorisadas tenor basegns e realisadas en in pli liung interval che previu. Edgar Durschei, cusseglier da vischnaunca e president dall’Uniun da commerci e professiun Mustér, defenda la proposta da reducir il pei da taglia per diesch pertschien: «Era pertuccont il pei da taglia ei la
vischnaunca da Mustér en concurrenza cun autras vischnauncas. Investar ei impurtont per restar attractivs, mo il pei da taglia ei era da muntada.» Ei seigi impurtont da mirar egl avegnir: «Il pagataglia ei aschidadir il client dalla vischnaunca. Mintga fatschenta sa ch’igl ei impurtont da tgirar sia clientella. Tier la vischnaunca ei quei buc auter.» Sch’ina interpresa vegli investir sappi ella era buca semplamein alzar ils prezis. «Secapescha ch’igl ei impurtont d’investir.
Mo quei sto semplamein succeder tenor las pusseivladads finanzialas che nus havein», puntuescha Edgar Durschei. El patratga en quei connex era vid il commerci. Era a quel seigi ei buca tuttina conta taglia ch’el hagi da pagar. Ina reducziun da sulettamein tschun pertschien dil pei da taglia fussi stada sulettamein per cuntentar quels che fetschien canera: «Ina reducziun da diesch pertschien ei in signal.»

Diesch pertschien ei (memia) bia
En in messadi fetg detagliau e cun bia cefras fa la suprastonza communala attent sillas consequenzas dalla reducziun da diesch pertschien. Cun quella reducziun mauncan alla vischnaunca annualmein rodund 340 000 francs. Tier in’atgna finanziaziun (cash-flow) d’intragliauter 2,2 milliuns francs muntan quellas meins entradas in manco annual da 16%. «Cun ina tala reducziun eis ei grev da contonscher la finamira d’in cash flow da dus milliuns
francs. Ella situaziun actuala ei quei memia bia. Cun ina reducziun da diesch pertschien astga ei buca capitar grondas surpresas tiels resultats
annuals futurs», constatescha il president communal René Epp. Culla proposta dalla suprastonza communala da reducir il pei da taglia per
tschun pertschien muncassen 170 000 francs en cassa mintg’onn. Duess il pievel refusar la proposta da reducir il pei da taglia per diesch pertschien, vegn la suprastonza communala a proponer ina reducziun da tschun pertschien dil pei da taglia el rom dalla tractaziun dil preventiv 2022. «La suprastonza communala vegn lu ad analisar mintga dus onns la situaziun e giudicar schebein ulteriuras reducziun dil pei da taglia ein pusseivlas e responsablas», puntuescha
René Epp.

Tgei di il cantun?
El messadi per mauns dil pievel giudichescha era igl Uffeci da vischnauncas dil Grischun la situaziun. El constatescha: «La situaziun da finanzas actuala dalla vischnaunca da Mustér ei sauna ed ordinada. Ella vegn da cuvierer sias expensas currentas cumpleinamein cun las entradas e ha actualmein mo in pign indebitament.» Tonaton fa el era attents sigl avegnir. Duessi la vischnaunca buca generar sufficientamein entradas per contonscher sias finamiras,
stuessi ella augmentar il pei da taglia sco era instradar mesiras per equilibrar il quen current. La vischnaunca da Mustér preveda da far investiziuns da 26 milliuns francs ils proxims diesch onns.