News-Details

50 onns Pendicularas Mustér

31.05.2022

Cun ina fiasta populara el Catrina Resort han las Pendicularas Mustér SA commemorau la mesjamna il giubileum da 50 onns. Il president dil cussegl d’administraziun, Marcus Weber, ha sutlingiau la tenuta visiunara dils fundaturs ed il president communal René Epp ha appellau alla solidaritad e la collaboraziun.

Hans Huonder/FMR

Igl onn 1969 ein las Pendicularas Mustér SA vegnidas fundadas culla finamira da sviluppar turisticamein la regiun. Iniziant dad ellas ei Pius Condrau staus. Ad el eis ei la fin finala era reussiu da carmalar la Societad da participaziun Arenberg GmbH da Düsseldorf a Mustér che vegneva menada lu da Heinz Capelle. Per vigelgia da Nadal igl onn 1971 ein ils emprems indrezs da transport vegni aviarts. Successivamein ein ulteriurs suandai. La societad d’Arenberg ei stada capoacziunara entochen igl onn 2015. Lu ha ella vendiu siu pachet d’aczias ad ina societad cun Marcus Weber alla testa. Lez ha buca mo procurau per novs indrezs el territori da skis, denter auter d’ennevar e la pendiculara nova a Sedrun, mobein ha er erigiu il Catrina Resort. Tut en tut ein rodund 130 milliuns francs vegni investai ils davos onns, ulteriuras investiziuns vegnan fatgas il mument ni ein sin rucca.

In miez tschentaner

En siu cuort plaid festiv la mesjamna sera ha Marcus Weber honorau surtut la prestaziun da Pius Condrau e da Heinz Capelle, mo lu era dils directurs Urs Häfliger e Hansjörg Lehmann ch’ein stai fideivels duront decennis all’interpresa. Suandai sco directurs ein Martin Kreiliger, Ruedi Büchi e dapi entgins onns diregia Stefan Arnold las pendicularas. «En sesez ei quei in pign diember da directurs d’ina interpresa en in temps d’in miez tschentaner. Quei demuossa la cuntinuitad e l’attaschadadad dad els enviers las pendicularas», puntuescha Marcus Weber. Cura ch’el hagi surpriu las pendicularas hagi el saviu ch’ei seigi necessari da procurar per letgs caulds: «Il hotel Acla da Fontauna ed il Disentiserhof eran serrai. Per quei motiv ei l’idea dil Catrina Resort naschida.» Quell’infrastructura lubeschi da mirar cun optimissem egl avegnir. Marcus Weber ha engraziau alla populaziun da Mustér e Tujetsch pil sustegn, mo constatescha il medem mument: «Senza las pendicularas savess bein enqual menaschi buca exister. Quei ch’ei vegniu fatg ils davos onns ei era per la proxima generaziun.» Sco segn d’engraziament per la collaboraziun sur decennis ha el retschiert ina bransina da Ueli Sutter dalla Garaventa.

Nus duvrein piuniers

Il president communal René Epp ha undrau ils fundaturs ed il medem mument accentuau: «Era igl avegnir duvrein nus piuniers sco Condrau, Capelle e Weber. Nus duvrein buca glieud che tschontscha, mobein che fa.» Marcus Weber hagi teniu plaid e hagi schau suandar ovras a ses plaids. Ei drovi persunas cun perseveronza, la politica da sia vart seigi promta da porscher maun: «Nus duvrein punts denter politichers, fatschentas, indigens e hosps da vacanzas. Mo lu eis ei pusseivel da sviluppar la regiun. Criticar quels che fan zatgei e far discordia meina a malaveglia.» La regiun stetti avon grondas sfidas, mo communablamein e cun solidaritad seigi ei pusseivel da surmuntar quellas cun success. Sco regal pil giubileum da 50 onns ha la vischnaunca da Mustér regalau allas Pendicularas Mustér SA ina punt sco simbol per la buna collaboraziun sco era 50 000 francs pil project dalla punt sur il Rein d’Acletta sur la staziun da val. 50 000 francs – aschidadir ina da melli per mintga singul onn d’existenza dallas pendicularas.

«Senza las pendicularas savess bein enqual menaschi buca exister.»

Marcus Weber, president dil cussegl d’administraziun