News-Details

La casa d’art a Segnas ei puspei aviarta

19.12.2022

Paul Duff/FMR

La dumengia vargada ein las portas dalla casa da scola veglia a Segnas vegnidas aviartas al publicum. Suenter 17 onns consecutivs ei la 18avla ediziun d’Art e sentupada vegnida frenada entras la pandemia corona. Dus onns ei l’occasiun curdada. Uss presentan sis artistas ed artists contemporans ed in pictur artist ch’ei buca pli denter nus lur ovras.

Lavur artistica fatga el zuppau

Artists lavuran savens el ruaus anonim da lur quater preits. Egl ambient nundisturbau neschan ovras extraordinarias, surprendentas ord lur profund persunal. Il pli savens ei il luvrar buca sulet in passatemps, mobein ina abstracziun da patratgs che fatschentan ils carstgauns ed in’elaboraziun emoziunala d’in schabetg ni d’ina situaziun persunala che fatschenta igl artist. Tristezia ni plascher ein d’enconuscher ellas ovras creativas. Colurs ed acziuns dil cuntegn laian interpretar il contemplader tgei che fatschenta il creader. Las acziuns da tener l’olma ed il patratg egl equiliber ein ton differentas tiels humans. Igl artist presenta ses sentiments sil tablett. Ses maletgs ein in spieghel da siu intern, mussaments da lutgas cun victorias ni sperditas. Natira ed art emprovan savens da sedividir – mo s’uneschan els nunspitgadamein. Aschia vesa Goethe la situaziun en sia poesia «Natur und Kunst» digl onn 1800. Il maletg che displai al contemplader fatschenta siu patratg e regorda el vid siu agen destin. Gest cheu s’unescha igl art culla natira.

Natira ed art en simbiosa

Heidi Durschei-Zimmerli unescha natira cun plaschers. Sias creaziuns ein ornaments ord materials naturals. Surstaus astg’ins esser da contemplar ovras da tonta lavur ed inspiraziun creativa. Quei vala era per ils objects da Sergio Marques: «La natira ei mia gidontra.» La part finala da sias creaziuns surlai el savens als elements naturals. Aua fa ruina, sulegl schigenta il lenn e scarpa lien sfendaglias. Dalla natira lai Mathias Jacomet inspirar per malegiar bials purtrets da selvaschinas, insects, plontas ed autras caussas ch’el entaupa en sia vischinonza. A moda interessanta van era ils conjugals Giordana e Gion Huonder vid lur maletgs artistics cun cuntegn dalla mumma tiara. La greppa che fuorma nos cuolms, l’aua che nescha leu els aults inspireschan lur creaziuns da maletgs e figuras. Nino Di Bella va cul contemplader el zuppau. Igl autur lai anflar e discuvierer las emoziuns en simbols discus implentai en ses maletgs. Emoziuns pon era ils maletgs da Linus Flepp svegliar. Stat il contemplader forsa nuncapend avon ina scena silla teila, gida igl artist bugen ad interpretar siu art. Gest en in tal mument san las differenzas scaldar ed effectuar discussiun, e quei ei l’intenziun digl artist. Gion Candinas(1921–2009) ei naschius a Mompé Medel e leu ei el turnaus el temps da sia pensiun si dalla Bassa. En quei temps ha el creau art ord pissiun. Siu fundus creativ nescha ord igl ambient muntagnard. Las muntognas dallas Alps resplendan en ses maletgs aschi variontas en tutta conformitad. La glisch cun umbriva e clarezia caschuna era cauld e freid. Tals elements ein cuntegn dils maletgs da cuntradas ed ambient enconuschent.

Star da cumpignia

Tier caffè cun petta ni tuorta selai seser levamein da cumpignia e cuntinuar il discuors sur digl art. Ils cantadurs dil Chor baselgia Segnas porschan allas visetas dall’occurrenza in ambient amicabel tier bunas tratgas e bubrondas. Ils artists ed ils commembers dil chor selegran sin biaras visetas. Da Sogn Stiafen, ils 26 da december e venderdis, ils 30 da december ei l’exposiziun puspei aviarta dallas 14.00 tochen las 19.00, respectivamein allas 18.00.