News-Details

Canera e puorla cumbinada cul plascher dalla novaziun

18.01.2023

Las lavurs d’engrondaziun e sanaziun dil Center Fontauna a Mustér progredeschan bein. Entochen la fin da quest onn duessen quellas egl intern esser ton sco terminadas. Allura san las lavurs ordaviert succeder igl onn vegnent. «Entochen uss havein nus surdau lavurs per rodund siat milliuns francs», di Clemens Berther, president dalla cumissiun da menaschi e da baghegiar. Tut en tut cuosta l’investiziun 10,6 milliuns francs. Buca sempla ei la fasa dallas lavurs egl intern pil persunal dil Center Fontauna. Igl ei da s’adattar a provisoris ed acceptar canera e puorla. «Zaco giavel va ei adina», di il menader dil center Gion Hosang. Entochen l’entschatta fenadur da quest onn duessen las lavurs vid l’entrada e la cafetaria nova esser terminadas. Medemamein quentan ins saver surdar lu la sala nova per polisport e quella pil center da fitness a lur intent. Entochen la fin digl onn duess il menaschi funcziunar cumpleinamein e la canera e la puorla duessen lu buca pli s’udir tiel mintgadi.

Hans Huonder/FMR

Mia viseta il gliendisdis el Center Fontauna a Mustér vegn buca mo accumpignada dil cordial beinvegni dil menader Gion Hosang e dil president dalla cumissiun da menaschi e da baghegiar Clemens Berther, mobein era dalla ramur mudergionta d’in trader. Quei tun sereparta e dominescha. L’entrada egl intern dil center succeda il mument silla via da vart sut dil center. Mo buca mo quei: las preits provisorias e las midadas gia succedidas regordan pauc vid il center d’avon in onn; surtut suten vegn il visitader avon igl emprem mument sco en in labirint. L’emprema egliada confirma denton era che la decisiun ch’il pievel ha priu la fin da settember 2021 cun grond pli d’engrondir e sanar il Center Fontauna ei stada ina buna. Suenter las lavurs vegn il center a sepresentar tut auter ch’entochen dacheu. Sulet la halla plurivalenta e per part aunc la halla da tennis vegnan a regurdar vid il baghetg vegl.

Engrondaziun pren conturas

Suenter l’approbaziun dil credit ed il project entras il suveran il settember 2020 ei suandau in temps intensiv da planisaziun en detagl. Il matg 2022 han las lavurs da baghegiar saviu vegnir lantschadas e cun ella ei arrivau in temps intensiv era pil persunal dil center. «Nus havein stuiu tschercar soluziuns per tut la rauba ed il material dil center», di Gion Hosang, il meinafatschenta dil Center Fontauna che selegra veseivlamein sil futur dil center cun infrastructura nova. El constatescha: «Igl ei veramein buca adina emperneivel e sempel da luvrar cun canera e puorla, era da stuer declarar la situaziun alla clientella. Zaco giavel va ei denton adina.» Sper las localitads ed ils cantuns avon maun el center, ein ins era sesurvius da tendas e containers per deponer material e rauba. Bia da quei ha stuiu esser disponibel: «Nus selegrein sil temps che nus savein puspei magasinar tut sistematicamein.» Entochen lu cuoza ei denton aunc in temps. Il mument ei il project avanzaus sco previu. Pil persunal dil Center Fontauna – en tut nov persunas che repartan in pensum da lavur da 630 % – ei quell’engrondaziun e sanaziun ina gronda sfida.

Ina sfida pil persunal

«Igl ei previu d’arver l’entrada principala culla cafetaria nova – che duei survegnir in niev num – l’entschatta fenadur da quest onn. Lu duein era las localitads polisportivas e pil fitness el plaunterren vegnir aviartas», di Clemens Berther. Quellas localitads sesanflan leu nua ch’il luvratori communal era pli baul. Entochen la fin da quest onn duessen tuttas lavurs principalas egl intern dil center esser terminadas, pia era las hallas da reiver e bouldrar sco era la halla da tennis. La finiziun dil project fan lavurs dil contuorn la primavera 2024 avon che la reavertura ed inauguraziun sappi succeder ufficialmein ils 24 d’uost 2024.

Fotovoltaica sin fatschada e tetgs

El decuors dad uonn vegnan las empremas surfatschas dil baghetg cuvretgas cun fotovoltaica. «Uonn succeda quei sil tetg dalla halla da tennis, l’auter onn era sil tetg dalla halla plurivalenta. Medemamein vegnin nus a cuvierer cun fotovoltaica la fatschada encunter sid dalla halla da tennis», di Clemens Berther. Aschia sa il Center Fontauna producir aunc dapli energia. Persuenter vegnan las finiastras ella halla da tennis encunter sid a svanir. Igl indrez da fotovoltaica vegn construius dalla Repower SA. Il Center Fontauna retila da lezza energia per cundiziuns specialas e suenter 20 onns vegn igl entir indrez en possess dalla vischnaunca.

«Pump parc» – ulteriura novaziun

In’ulteriura nova purschida dil Center Fontauna – sper tut quei ch’ei niev egl intern – vegn in «pump parc» ad esser. La decisiun davart quel vegn prida proximamein, ils cuosts netto persuenter per la vischnaunca importan 165 000 francs. El vegn construius el sectur sur ils plazs da tennis buca lunsch naven dalla plazza da giugs ed ei adattaus per bike ni era skateboard. Tenor Clemens Berther ein lavurs per 3,7 milliuns francs gia fatgas el Center Fontauna, tut en tut ei vegniu surdau entochen uss lavurs per siat milliuns francs. In laud han ton Gion Hosang sco Clemens Berther per la collaboraziun cullas interpresas ed ils architects ed inschigniers responsabels: «Ei vegn luvrau cun grond engaschament e risguard dalla situaziun.» Dil reminent: All’entrada nova el center vegn plazzau ina nova fontauna. «Persuenter ei la Corporaziun d’aua Spina da vin Mustér responsabla. Ella vegn realisada d’in artist indigen», di Clemens Berther, tradescha denton buca il num da quel. Aschia duei vegnir fatg tutt’honur al num «Fontauna».

Baghegiaus 1980/81

Il Center da sport e cultura Acla da Fontauna che vegn numnaus Center Fontauna dapi entgins onns, ei vegnius construius ils onns 1980/81. Lu ei la part principala culla halla plurivalenta e la halla da tennis vegnida realisada, sco era las localitads per la protecziun civila. 1994/95 eis el vegnius engrondius, denter auter culla plazza da ballapei, la plazza da glatsch e la Sala Fontauna. Pliras sanaziuns e lavurs da manteniment ein succedidas ils davos 20 onns, surtut els stabiliments externs. Il coc dil center ei la treidubla halla plurivalenta. Il Center Fontauna ei buca mo in liug per sport, mobein ha era adina surviu cun sia infrastructura a gronds arranschaments da divertiment e cultura ni in tschuppel ga all’exposiziun da commerci e professiun regiunala. Las localitads per la protecziun civila vegnan nezegiadas per camps da giuvenils. Annualmein generescha il center entochen 15 000 pernottaziuns. Il center ei vegnius realisaus ed ei en possess dalla vischnaunca da Mustér.