News-Details

Lavurs per la punt pendenta entscheivan prest

16.02.2024

Hans Huonder/FMR

A sia radunonza generala dils 15 d’avrel 2023 ha l’Uniun la pendenta decidiu da realisar la punt pendenta da S. Gada a Mustér sur il Reinanteriur entochen sut Mompé Medel il mument che la finanziaziun ei garantida per 90 % e la lubientscha da baghegiar ei concedida. Omisduas premissas ein ademplidas ussa. Sco la suprastonza constatescha en in scriver allas commembras ed ils commembers dall’uniun, ei la finanziaziun garantida per 91 % e la lubientscha da baghegiar ei avon maun. «Consequentamein ei la finanziaziun garantida e la suprastonza ha instradau las lavurs dalla realisaziun», scriva la suprastonza.

Detagls dalla punt pendenta:

- la punt vegn purtada da sis sugas cun in diameter da mintgamai 45 mm

- las sugas ein vegnidas empustadas la fin da schaner

- tut en tut setracta ei da sugas cun ina lunghezia totala da 3500 meters

- ei vegn baghegiau cun 35 tonnas sugas ni construcziuns d’itschal

- la construcziun cun ancras ha ina forza horizontala da 720 tonnas

- la lunghezia dalla punt munta 270 meters, il pli ault punct ei 100 meters sur il Rein anteriur

Entschatta dallas lavurs

«Il mument vegnan las plontas allontanadas el liug dalla punt entras la vischnaunca. Nossa finamira ei d’entscheiver cullas lavurs pils fundaments dalla punt en rodund duas jamnas», di Christian Loretz , il president dall’uniun. El decuors dalla primavera e la stad duein las ancras per fermar la punt sco tala vegnir construidas. Naven digl uost duei la construcziun dalla punt allura vegnir montada, en special setracta ei dallas sugas: «Sche tut va sco previu duess la punt esser accessibla il november vegnent», di Christian Loretz sin damonda dalla FMR. Il mument sefatschentan ils inschigniers cun ils davos detagls dalla construcziun e la statica. Per l’uniun ein la surdada dallas davosas lavurs e l’entschatta da quellas in impurtont termin ed in ulteriur pass ella realisaziun dil project ambizius. Ulteriurs detagls vegnan communicai alla radunonza generala dall’Uniun la pendenta ch’ei ils 6 d’avrel 2024 allas 18.00 en halla Cons a Mustér.

Recaltgau ulteriurs daners

Ils cuosts totals pil project dalla punt pendenta ein calculai cun 1,8 milliuns francs. «Il mument mauncan aunc rodund 200 000 francs», scriva la suprastonza dall’uniun. Dapi il settember seigi ei reussiu da recaltgar ulteriurs mieds finanzials: «Ulteriurs sponsurs sco era las vischnauncas da Tujetsch e Medel han sincerau in sustegn finanzial.» 25 000 francs ha l’uniun retschiert dalla Banca Raiffeisen Cadi. Igl atun vargau ha l’uniun era survegniu la nova dalla regenza ch’il cantun sustegni il project cun ina contribuziun cantunala da maximalmein 586 000 francs vid ils cuosts totals per construir la punt pendenta. Quei ein 30 % dils cuosts dall’investiziun.